Սահմանադրական դատարանի շուրջ առաջացել է խառնաշփոթ թե՛ իրավական, թե՛ քաղաքական դաշտում, և լուծման կոնսենսուս դեռևս չկա: Արդյո՞ք առկա է ճգնաժամ: «Առաջին լրատվական»-ի հետ զրույցում «Լուսավոր Հայաստան» խմբակցության պատգամավոր Արման Բաբաջանյանն անդրադարձավ այս խնդիրն առաջացնող պատճառներին՝ ընդգծելով. «Ճգնաժամն սկիզբ առավ հայտնի գործով դատական որոշումից հետո, երբ հանկարծ հայտնաբերեցինք, որ դատական իշխանությունում իրերի դրությունը հուսադրող չէ և բավական լուրջ խնդիրներ կան, ինչն էլ նաև քաղաքական զարգացումների պատճառ դարձավ… Կարծում եմ, որ այսօր տեղի ունեցած զարգացումը կարող է նաև կանխորոշել ՍԴ շուրջ ստեղծված թնջուկի հանգուցալուծումը: Այո՛, առաջացել է ճգնաժամ՝ բնական պատճառներով: Հեղափոխությունից հետո դատական իշխանությունը միակն էր, որ չէր վայելում ժողովրդի վստահությունը, և մի օր այդ հարցը պետք է գար օրակարգ… Դատական իշխանությունը ժողովրդի վստահությանը և սպասումներին համարժեք դարձնելու խնդիրն է լուծվում…»:
Պատգամավորի խոսքով՝ վերջին շրջանում ՍԴ անդամներին պաշտպանելու գործին լծվել են մարդիկ, որոնք 20 տարի շարունակ ուղղակի «բռնաբարել են» Հայաստանի մայր օրենքը՝ Սահմանադրությունը:
«Քոչարյանը, Սարգսյանը և մյուս օլիգարխները պետք է մնան անցյալում»,- ընդգծեց Ա. Բաբաջանյանը:
Ռ. Քոչարյանն այսօր կալանավորվեց, մեծ քաղաքականություն վերադառնալու նկրտումներ ունի՞ նա, թե՞ դա ուղղակի պաշտպանական դրսևորում էր կամ ինչ-որ տեղ նաև սպառնալիք: Այս հարցին ի պատասխան՝ Ա. Բաբաջանյանն ընդգծեց. «Ռ. Քոչարյանը կունենա այդպիսի նկրտումներ, եթե մենք չլինենք մեր տեղում, մեր դիրքերում և չլինենք մեր պետության պաշտպանության խրամատներում, եթե ժամ առաջ չլծվենք մեր երկրի ապագայի խնդիրների լուծմանը և եթե չկարողանանք մեր ժողովրդին հավատ ներշնչել, որ անցյալն ապագայում տեղ ունենալ չի կարող:
Ես զարմանում եմ Քոչարյանի մտայնության, պատկերացումների վրա, թե կարող է որևէ քաղաքական ուժ աջակցություն հայտնել իրեն՝ դրանով թաղելով իր քաղաքական ապագան: Ռ. Քոչարյանը չի պատկերացնում, որ կյանքը ոչինչ է Ռ. Քոչարյանի ու նրա նմանների վերադարձի դեմն առնելու տեսանկյունից: Անձամբ ես, և վստահ եմ ինձ նման շատ գործիչներ, ոչնչի առաջ չենք կանգնելու և անհնարինն է արվելու, որպեսզի կանխվի նրանց վերադարձը»:
Մանրամասն՝ տեսանյութում:
