Ես կզարմանայի, եթե դատարանն այլ որոշում կայացներ։ Այս մասին այսօր՝ հունիսի 25–ին, ԱԱԾ–ի մոտ լրագրողներին ասաց ՀՀ երկրորդ նախագահ Ռոբերտ Քոչարյանի որդին՝ Լևոն Քոչարյանը, որը Քոչարյանի աջակիցների հետ «Երևան–Կենտրոն» ՔԿՀ էր գնացել՝ կալանավայր մտնելուց առաջ հորը տեսնելու և սատարելու։
«Դատարանը հնարավորություն չտվեց պաշտպանական կողմին իր դիրքորոշումը ներկայացնել, մինչև այդ էլ պրոցեսները տեսանք՝ սկսած մակագրությունից, թե ինչպես է եղել: Այսինքն՝ պարզ էր՝ ինչ է լինելու»,– ասաց նա։
Նրա խոսքով՝ Վերաքննիչ քրեական դատարանի դատավոր Արմեն Դանիելյանի որոշումն աննախադեպ էր։
«Շատ կարևոր է դատավորի ներքին անկախությունը, թե ինչքանով նա կարող է ինչ-որ որոշում կայացնել՝ հասկանալով, որ դա կարող է իշխանությանը դուր չգալ։ Կարևոր էր, որ դատավորն այդ տղամարդկությունը ունենար շարժվելու օրենքով, այս դեպքում՝ դա տղամարդկության հարց էր»,– ասաց նա: