Այսօր՝ հունիսի 25-ին, Ազգային ժողովը շարունակում է արտահերթ նիստի աշխատանքները: Շարունակվում է Հարկային օրենսգրքում փոփոխություններ կատարելու մասին հարցի քննարկումը:
Դիմելով հարկատուներին՝ տնտեսական հանձնաժողովի նախագահ Բաբկեն Թունյանն ասաց. «Օրենքը ուժի մեջ մտնելը օրերի հարց է՝ այսօր «Իմ քայլը» կողմ կքվեարկի, և նախագահի կողմից ստորագրվելուց անմիջապես հետո 115 մլն-ի շեմի վերաբերյալ դրույթը կմտնի ուժի մեջ»:
Իր եզրափակիչ ելույթում Բաբկեն Թունյանն ասաց, որ Հարկային օրենսգրքի քննարկումը առաջին օրվանից սկսած իրեն հիշեցնում է «Կարգին հաղորդման» մի հայտնի սկետչ, երբ դասախոսը ուսանողին կտրելու համար ասում է, որ թվարկի Նագասակիի և Հերոսիմայի վրա ատոմային ռումբ գցելու արդյունքում զոհվածների անունները. «Համոզված եմ՝ կիսում եք իմ կարծիքը, որ այս Հարկային օրենսգիրքը շատ ավելի լավն է գործողից: Մենք ասում ենք՝ եկեք մի քայլ առաջ անենք, հետո ավելի գլոբալ փոփոխությունների կգնանք, դուք ասում եք՝ չէ, քանի որ սա թռիչքային աճ չի ապահովում, մենք դեմ ենք: Եթե մի պահ պատկերացնեք, որ ձեր «դեմն» անցնի, ինչ է լինելու: Եթե այս Հարկային օրենսգիրքը վատն է, ինչու են գործարարներն անհամբեր սպասում սրա ընդունմանը»:
Բաբկեն Թունյանը տարօրինակ է համարում այն, որ այս դեմ քվեարկող ընդդիմությունն աշխատել է Հարկային օրենսգրքի դրույթների վրա. «Սա նման է նրան, որ մեկը խորոված անի, մյուսներն օգնեն ու վերջում ասեն՝ էս խորովածը չուտեք, որովհետև վնաս է, ավելի լավ է սպասեք ու սոված մնացեք՝ մինչև տավարի միսը բերենք: Ուզում եմ ասել՝ մի քիչ գլոբալ մտածեք»:
Մանրամասները՝ տեսանյութում: