Լուրեր
Դատական համակարգում ճգնաժամ է․ ձերբազատվելու ենք համակարգը վնասողներից․ Վիգեն Քոչարյան

Վիգեն Քոչարյանը ԲԴԽ անդամ է ընտրվել ԱԺ-ի հունիսի 21-ի նիստում՝ 114 կողմ, 4 դեմ ձայներով: Նրա թեկնածությունն առաջադրել էր իշխող «Իմ քայլը» խմբակցությունը: Այսօր Վիգեն Քոչարյանը երդման արարողությամբ ստանձնել է այդ պաշտոնը:

Ինչո՞վ է տարբերվելու նոր Բարձրագույն դատական խորհուրդը նախորդից. «Առաջին լրատվական»-ի հետ զրույցում, ի պատասխան այս հարցի, Վ. Քոչարյանը նշեց. «Ես ԲԴԽ-ն նոր չեմ համարում, որովհետև թեև կազմում զգալի փոփոխություններ են տեղի ունեցել, սակայն, ըստ էության, ԲԴԽ մարմինն իր սահամանդրաիրավական կարգավիճակով, Սահմանադրությամբ տրված լիազորություններով նույնն է մնում: Առաջիկայում ակնկալում ենք նոր փոփոխություններ՝ կապված ինչպես ԱԺ-ի կողմից նոր գիտնական անդամի ընտրության հետ, այնպես էլ դատավորների ընդհանուր ժողովի կողմից դատավոր անդամների համալրման հետ»:

Վ. Քոչարյանն ընդգծեց, որ ԲԴԽ անդամ ընտրվելը և այդ պաշտոնը ստանձնելը մեծ պատասխանատվություն է իր համար և հավաստիացրեց՝ ԲԴԽ նոր անդամները առաջիկա գործունեությամբ փորձելու են ապացուցել, որ եկել են դատական իշխանությունը առողջացնելու, և այդ փոփոխությունը Հայաստանի ժողովուրդը կզգա իր առօրյայում:

ԲԴԽ նորընտիր անդամի խոսքով՝ հստակ տրամաբանություն կա, որ վեթինգ պետք է իրականացնեն ԲԴԽ-ն և Կոռուպցիայի կանխարգելման հանձնաժողովը. «ԲԴԽ-ն ի սկզբանե ստեղծվել է նմանատիպ գործառույթ իրականացնելու համար… Հակակոռուպցիոն մարմնի գործառույթը մի քիչ այլ պետք է լինի, որը պետք է պատասխանատու լինի, որ բոլոր հանրային ծառայողները համապատասխանեն հակակոռուպցիոն չափանիշներին, բացառություն չեն կազմելու նաև դատավորները: Համապատասխան օրենսդրական մշակումներ կլինեն, աշխատանքի հստակ տարանջատում կլինի»:

Վ.Քոչարյանն ընդգծեց, որ վեթինգի իրականացումն ինքնանպատակ չէ, այն գործիք է համապատասխան խնդիր լուծելու համար. «Խնդիրն այն է, որ ստեղծվել է մի վիճակ, որ դատական իշխանությունն ունի հանրային անվստահություն, և անհրաժեշտ են քայլեր, որպեսզի այդ իրողությունը փոփոխվի. այդ նպատակի իրականացման գործիքներից է վեթինգը»: Մեր զրուցակիցն անդրադարձավ նաև հարցին, թե ով պետք է վեթինգի ենթարկի ԲԴԽ-ին:

Վ. Քոչարյանի դիտարկմամբ՝ դատական համակարգում ճգնաժամ է՝ ակնհայտ են տարբեր դրսևորումներ կան. «Ոլորտում արմատական փոփոխություններ անելու անհրաժեշտություն կա… Ձերբազատվելու ենք համակարգը վնասողներից»:

 

Մանրամասն՝ տեսանյութում:

  • Դիտումներ՝ *