Թբիլիսիում իրավիճակը շարունակում է մնալ լարված։ Զանգվածային բողոքի ակցիաների մասնակիցները պահանջում են Վրաստանի ներքին գործերի նախարար Գիորգի Կախարիայի հրաժարականը։ Ցուցարարների խորհրդարանական ընտրությունների համամասնական կարգով կազմակերպելու պահանջն այսօր բավարարվեց՝ Բիձինա Իվանիշվիլին հայտարարել է, որ 2020 թվականի ընտրությունները կանցկացվեն համամասնական կարգով։
Հայտնի դեպքերի պատճառ հանդիսացած միջոցառմանը ներկա է եղել նաև հայկական պատվիրակությունը ԱԺ փոխնախագահ Ալեն Սիմոնյանի գլխավորությամբ, և քաշքշուկի սկսվելուց հետո մեր պատվիրակությունը լքել է դահլիճը, ինչը, թերևս, քննարկումների տեղիք տվեց։ Դուք ինչպե՞ս կմեկնաբանեք «Առաջին լրատվական»-ի հարցին ԱԺ «Իմ քայլը» խմբակցության պատգամավոր Անուշ Բեղլոյանը պատասխանեց․ «Չմոռանանք, որ այս միջոցառումը միջազգային էր, և Վրաստանը, ընդամենը, հանդիսանում էր հարթակ, որտեղ այն տեղի էր ունենում։ Մեր պատվիրակությունն այնտեղ ցուցաբերել է այն վարքը, որը ցուցաբերել են մյուս պատվիրակությունները, քանի որ մեր պատվիրակությունն այդ միջադեպի հետ ոչ մի առնչություն չունի։ Մեր գործընկերները դահլիճում մնացել են այնքան ժամանակ, մինչև կարծում էին, որ այդ միջադեպը չի ունենա այդպիսի շարունակություն։ Հետագայում, երբ պարզ դարձավ, որ այլևս անհնար է շարունակել վեհաժողովը, բոլորի հետ միասին մեր պատվիրակությունը լքել է դահլիճը»։
Իսկ «Օրբելի» վերլուծական կենտրոնի փորձագետ, վրացագետ Ջոնի Մելիքյանն ասաց․ «Վրաստանի ընդդիմությունը՝ «Եվրոպական Վրաստան» կուսակցության պատգամավորները, որոնք քաջ տեղյակ էին, որ այդպիսի միջոցառում պետք է տեղի ունենա, որովհետև չեմ կարծում, որ ցանկացած պատգամավոր դրոշը հետն է գնում աշխատանքի։ Պարզ է, որ իրենք գիտեին, որ նա նախագահությունում է նստելու, և այդ մասը նրանք ճիշտ օգտագործեցին՝ բարձրացրեցին աղմուկ։ Հակառուսականությունը, որը կար որոշ զանգվածի մոտ, օգտագործեցին և մարդկանց դուրս բերեցին փողոց»։
Մանրամասները՝ տեսանյութում։
