Այսօր՝ հունիսի 24-ին, հրավիրվել է Ազգային ժողովի արտահերթ նիստ:
Հաշվեքննիչ պալատի 2018թ. տարեկան հաղորդման քննարկմանը «Լուսավոր Հայաստան» խմբակցության պատգամավոր Արման Բաբաջանյանը հայտարարեց. «2007 թվականից Հայաստանի աղքատ բնակչության պաշտոնական թիվը ավելացել է մոտ 100 հազարով, ոչ պաշտոնական տվյալներով՝ 500 հազարով: 10 տարվա մեջ հասարակական բևեռացվածությունն ավելացել է՝ հարուստներն ավելի են հարստացել, աղքատներն՝ ավելի աղքատացել»:
Անդրադառնալով գործազրկության և ՀՆԱ-ի ցուցանիշներին՝ պատգամավորն ասաց. «Փոխարենը տպավորիչ կերպով աճել է պետական պարտքը՝ 2007թ. վերջին այն 1,5 մլրդ դոլար էր, 2017-ի վերջին՝ 6,7 մլրդ դոլար: Ընդ որում՝ 2007-ին յուրաքանչյուր բնակչի ուսերին ծանրացած էր 588 դոլար պարտք, 2017-ի վերջին՝ 2254 դոլար կամ 3 անգամ ավելի շատ: Մեծագույն կասկածի տակ է պետական պարտքի միջոցների օգտագործման արդյունավետությունը»:
Նա նշեց նաև, որ նվազել է ՀՀ մշտական բնակչության թիվը՝ 2007թ. 3 մլն 230 հազարից 2018թ. հունվարի 1-ին դառնալով 2 մլն 972 հազար. «Տասը տարիներին երկրի մշտական բնակչությունը կրճատվել է առնվազն 260 հազարով»:
Խոսելով ներդրումների մասին՝ Արման Բաբաջանյանը նկատեց, որ 2007-ի վերջին դրանք կազմել են 1 մլրդ 132 մլն դոլար, 2016-ին՝ 170 մլն դոլար. «Պարոն Յոլյան, 2018-ին ձեր վարչապետը խոստացել էր 850 մլն-ի ներդրում, սակայն, ըստ պաշտոնական տվյալների, կատարել է ներդրումների 19 տոկոսը, ընդ որում՝ օտարերկրյա ներդրումների մասին՝ ոչ մի խոսք»:
Դիմելով Հաշվեքննիչ պալատի նախագահին՝ Արման Բաբաջանյանն ասաց. «Դուք պետական կառավարման համակարգ եք վերադարձել 2007 թվականին, դրա համար ես թվարկեցի այդ թվականից Ձեր ուղղակի մասնակցությամբ Հայաստանը կեղեքելու և հարստահարելու հետևանքով երկրի վիճակը նկարագրող որոշ խոսուն թվեր»:
Պատգամավորը այս քննարկումը ֆարս համարեց. «Եվ տարօրինակ եմ համարում, որ մեզ էլ մասնակից եք համարում այս քննարկմանը: Չեմ հասկանում՝ ով է մերժվել 1 տարի առաջ, ինչու է միայն նա մերժվել, արդյոք մերժումը վերաբերելի է եղել միայն ա՞յդ անձին, թե՞ մերժվողը այդ մարդակուլ համակարգն է եղել, որի առանցքային դերակատարներից է եղել նաև Լևոն Յոլյանը»:
Դիմելով նրանց, որոնք մասնավոր սեկտորում աշխատանքի փորձ ունեն, պատգամավորը հարցրեց. «Դուք պատրա՞ստ եք ձեր ընկերությունում աուդիտ կամ հաշվեքննություն հանձնարարել մեկին, ում չեք վստահում, մեկին, ով թալանչի է կամ առնվազն թալանի մասնակից, մեկին, ով պատրաստ է աչքաթող անել հիմնարկի հաշվապահության տակ հատուկ նախկին պատասխանատուների կողմից թողնված ականները, հետն էլ անձնական դրդապատճառներով սեփական ռումբերն ավելացնել: Հուսամ՝ պատասխանը բացասական է: Բա ինչո՞ւ է պետական միջոցների և ծախսերի արդյունավետության հաշվեքննությունը կամ աուդիտը վստահվել Սերժ Սարգսյանի մտերմագույն մարդկանցից մեկին, ո՞րն է պատճառը, որ Լևոն Յոլյանը հեղափոխությունից 1 տարի անց զբաղեցնում է այս կարևորագույն պաշտոնը: Արդյո՞ք այն, որ հեղափոխական իշխանությունը նրան փոխարինող կադր չի գտել: Իսկ գուցե օրինաչա՞փ է, որ դրանով պետք է զբաղվի Սերժ Սարգսյանի մտերմությամբ կաշկանդված թույլ անձնավորությունը»:
Արման Բաբաջանյանը կանգ առավ մի ցցուն փաստի վրա. «Պարոն Յոլյանը էներգետիկայի նախարարի պաշտոնում է նշանակվել 2016 թվականին: Այս ուսումնասիրության մեջ որևէ խոսք չկա նախարարի պաշտոնում նրա կողմից գործված թալանի մասին ԲԷՑ-ում: Փոխարենը պարոն Յոլյանը այս հաղորդման մեջ ներկայացնում է ուսումնասիրություն՝ սկսած 2018 թվականից»:
Խոսելով բիզնեսի հետ Հաշվեքննիչ պալատի նախագահի կապերի մասին՝ պատգամավորը հարցրեց. «Ձեզ ծանո՞թ է «Մակրո-Երևան» ՍՊԸ-ն: Այդ ընկերությունում Դուք սեփականատեր եք նախկին ոստիկանապետ Ալիկ Սարգսյանի հետ: Ձեզ ծանո՞թ է «Մարկ ինթերնեշնլ» ՍՊԸ-ն, որը զբաղվում է մեծածախ և մանրածախ էլեկտրատեխնիկայի վաճառքով: Այս ընկերությունում Ձեր կինը՝ Անուշ Ասլանյանը, համասեփականատեր է նույն ոստիկանապետ Ալիկ Սարգսյանի և ՀՀԿ-ական նախկին պատգամավոր Արմեն Մխիթարյանի հետ: Ի՞նչ եղավ 2015թ. Գեղարքունիքի մարզի Կութ գյուղի վարչական տարածքում նախատեսված ոսկու հանքավայրի հետ: Կարելի՞ է իմանալ, ձեր կինը ի՞նչ միջոցներով էր ծրագրել հիմնել այդ բիզնեսը»:
Արման Բաբաջանյանի կարծիքով՝ պարոն Յոլյանին այս Ազգային ժողովում հաղորդում տալու առիթ չպետք է տրվեր. «Ես անարժանապատիվ մի բան եմ տեսնում սրանում. այս հարցերին պետք է պատասխանի իշխանությունը: Հույս ունեմ այս քննարկման ընթացքում մենք կլսենք այս հարցերի սպառիչ պատասխանները, այլապես ստիպված ենք լինելու արձանագրել, որ նոր Հայաստանում ոչ միայն չեն բացահայտվում անցյալի հանցավոր դրվագները, այլև թույլ է տրվում, որ դրանց մասնակիցները կարևոր պաշտոններ զբաղեցնեն: Իմ սեփական վերլուծությամբ կարող ենք պնդել, որ Լևոն Յոլյանն ամբողջությամբ համապատասխանում է քրեաօլիգարխիկ համակարգի ներկայացուցչի չափանիշներին: Պարոն Յոլյան, Ձեզ կոչ եմ անում Ձեր ամփոփիչ ելույթը հրաժեշտի տեքստ դարձնել: Ես ձեզ իմ կողմից հայտարարում եմ՝ պերսոնա նոն գրատա և ասում եմ՝ հաջողություն»:
Մանրամասները՝ տեսանյութում: