Իրանի հետ հնարավոր նոր միջուկային գործարքը կարող է կնքվել տարբեր ձևերով, սակայն բոլոր դեպքերում այն պետք է կանխարգելի Իսլամական Հանրապետությունում միջուկային զենքի հայտնվելը: Այս մասին հայտարարել է ԱՄՆ նախագահ Դոնալդ Թրամփը, հաղորդում է Reuters-ը:
«Ինձ համար միևնույնն է, թե ինչ տիպի կլինի այդ գործարքը: Հնարավոր է մենք նրանց հետ բանակցենք առանձին, հնարավոր է գործարքը ներառի բոլորին:
Ցանկացած բան, որն արդյունքի կհանգեցնի. նրանք չպետք է միջուկային զենք ունենան»,- ասել է ամերիկացի առաջնորդը:
Հարցին, թե նրա կարծիքով ինչ է ցանկանում Թեհրանը, նախագահը պատասխանել է, որ իրանցիները, ամենայն հավանականությամբ, ցանկանում են բանակցություններ վարել և գործարք կնքել Միացյալ Նահանգների հետ: «Ես չեմ կարծում, որ նրանց դուր է գալիս իրավիճակը, որում նրանք հայտնվել են, նրանց տնտեսությունը բացարձակապես քայքայված է»,- Թրամփի խոսքերը մեջբերում է գործակալությունը:
Հունիսի 21-ին Թրամփը հայտարարել էր, որ կանգնեցրել է Իրանին ԱՄՆ զինված ուժերի հարվածը՝ դրա իրականացումից տասը րոպե առաջ: Հաջորդ օրը նա հերքել է իր խոսքերը և պարզաբանել, որ միայն ժամանակավորապես է դադարեցրել հարձակումը:
Հունիսի 20-ին Իսլամական հեղափոխության պահապանների զորակազմը խոցել է ԱՄՆ-ի հետախուզական անօդաչու սարքը: Ամերիկյան կողմն առաջին անգամ հերքել է այդ տեղեկությունը, սակայն այնուհետև խոստովանել է, որ Իրանը խոցել է ամերիկյան խոշորագույն RQ-4A Global Hawk անօդաչուն:
