Ավանդաբար Ֆրանսիայի Շամոնի քաղաքում կազմակերպվող «Մտքերի գագաթաժողով» հեղինակավոր միջոցառումն այս անգամ հյուրընկալվել է Հայաստանում և ստացել «Մտքերի հայկական գագաթաժողով» անվանումը՝ մեկ հարկի տակ համախմբելով հայաստանցի և օտարերկրացի ավելի քան երկու հարյուր նախկին ու ներկա պետական և քաղաքական գործիչների, հայտնի վերլուծական կենտրոնների, բարձր տեխնոլոգիաների ոլորտի աշխարհահռչակ ընկերությունների ներկայացուցիչների, գիտնականների, վերլուծաբանների, գործարարների ու ձեռնարկատերերի: Գագաթաժողովը Հայաստանում կազմակերպելու բացառիկ պայմանավորվածությունը ձեռք էր բերվել 2018թ. սեպտեմբերին, երբ ՀՀ նախագահ Արմեն Սարգսյանը Ֆրանսիայում մասնակցում էր «Մտքերի գագաթաժողովին»:
Թեմայի շուրջ «Առաջին լրատվական»- ի հետ զրույցում իրենց դիտարկումները ներկայացրին ԵՊՀ արևելագիտության ֆակուլտետի դեկան Ռուբեն Մելքոնյանը և թուրքագետ Վարուժան Գեղամյանը, ովքեր մասնակցել են վերոնշյալ գագաթաժողովին:
Կարևորելով իմիջը, որը կերտվում է պետությունների շուրջ՝ Ռուբեն Մելքոնյանը նշեց, որ Հայաստանը, ունենալով որոշակի ռեսուրսներ, կարող է հավակնել ինտելեկտուալ պետության իմիջին, և նմանատիպ գործընթացները և համաժողովները դա կարող են ավելի հնարավոր դարձնել: «Մենք աշխարհում հայտնի ենք որպես շախմատային գերտերություն, մեր իմիջը կապված է մտավոր ռեսուրսների հետ, և շատ բնական է, որ այս համաժողովը պետք է մի օր տեղի ունենար Հայաստանում»,- նշեց Ռ. Մելքոնյանը՝ հավելելով, որ համաժողովի արդյունքերը բազմազան են, որոնցից կարևոր է հատկապես այն, որ Հայաստանը միջազգային մամուլում, հեղինակավոր գիտական, վերուծական, քաղաքական շրջանակներում վերահաստատեց մտավոր գերտերություն լինելու իր արդարացված հավակնությունները:
Վարուժան Գեղամյանը նշեց, որ «Մտքերի հայկական գագաթաժողով»-ում քննարկվում էին աշխարհում առկա մարտահրավերների, արդիական խնդիրների վերաբերյալ բազմաթիվ թեմաներ:
Ռ. Մելքոնյանի դիտարկմամբ՝ գագաթաժողովի հիմնական ուղերձը բաժանվում է մի քանի բաղադրիչների… «Հիմնական մեսիջն այն էր, որ աշխարհին միավորող ամենակարևոր գործոններից մեկը մտքերն են, ինտելեկտն է, և Հայաստանը դրա համար շատ կոմֆորտ տարածք է»:
Մանրամասն՝ տեսանյութում:
