Թբիլիսիում Ռուսթավելի պողոտայում խորհրդարանի շենքի առաջ ընթացող բողոքի ցույցի ժամանակ բերվել են հատուկջոկատայիններ, հաղորդում է վրացական Առաջին ալիքը:
Նրանք դիրքավորվել են խորհրդարանի մուտքի մոտ:
Ակցիայի մասնակիցները նրանց բղավոցներով և սուլոցներով են դիմավորել:
Խորհրդարանի առջեւ ընթացող ցույցին ելույթ ունեցողները դժգոհությունն են հայտնել երեկ տեղի ունեցած իրադարձությունների վերաբերյալ:
Հինգշաբթի երեկոյան Թբիլիսիում տեղի է ունեցել լայնածավալ հակակառավարական ցույց, որը կազմակերպվել էր Վրաստանի խորհրդարանում ՌԴ Պետդումայի պատգամավոր Սերգեյ Գավրիլովի ելույթի հետևանքով: Մասնակիցները պահանջում էին ներքին գործերի նախարարի, խորհրդարանի ղեկավարի և ազգային անվտանգության ծառայության ղեկավարի հրաժարականը:
Իշխանությունները հրաժարվել էին իրականացնել այդ պահանջները, և կեսգիշերին մոտ հանրահավաքի մասնակիցները փորձել էին ներխուժել խորհրդարանի շենք:
Ոստիկանությունը ցրել էր հանրահավաքը՝ կիրառելով արցունքաբեր գազ, ռետինե փամփուշտներ և ջրցաններ: Բախումների հետևանքով տուժել է 240 մարդ, այդ թվում՝ 80 ոստիկան: Տարբեր իրավախախտումների համար բերման են ենթարկվել 305 ցուցարարներ: