Թբիլիսիի կենտրոնում տեղի ունեցած բազմահազարանոց հակառուսական ուղղվածություն ունեցող ցույցերից հետո հրաժարական տվեց Վրաստանի խորհրդարանի խոսնակը։ Թբիլիսիի քաղաքապետ Կախա Կալաձեի խոսքերով՝ Իրակլի Կոբախիձեն հրաժարական տվեց՝ ելնելով ժողովրդի առջև պատասխանատվությունից: Նախորդ գիշեր բախումների հետևանքով 240 մարդ է վիրավորվել, այդ թվում՝ 80 ոստիկան: Իրաքլի Կոբախիձեի հրաժարականը ցուցարարների պահանջներից մեկն էր: Նրանք պահանջում են նաև ուժային կառույցների ղեկավարների հրաժարականը: Ցուցարարները մտադիր են այսօր երեկոյան վերադառնալ հրապարակ: Բողոքի ակցիաները սկսվել էին այն բանից հետո, երբ Վրաստանի խորհրդարանում անցկացվող Ուղղափառության միջխորհրդարանական վեհաժողովի նիստը նախագահող Ռուսաստանի Պետդումայի պատգամավոր Սերգեյ Գավրիլովը նստել էր Վրաստանի խորհրդարանի խոսնակի աթոռին։
Վրաստանի հարցերով փորձագետ Ջոնի Մելիքյանը, «Առաջին լրատվական»-ի հետ զրույցում անդրադառնալով Վրաստանի իրադարձություններին, նշեց՝ հակառուսական տրամադրությունները Վրաստանում նորություն չեն, բայց այս պարագայում օգտագործվել է այս գործոնը՝ ներքաղաքական պայքարի մեջ։ Կարելի է ասել, որ ինչ-որ տեղ ստացվեց, բողոքի ալիք բարձրացավ, մարդիկ դուրս եկան փողոց և նույնիսկ փորձ արվեց գրավել խորհրդարանի շենքը։ Գիշերը ոստիկանությունն ինչ-ինչ գործողություններով, օգտագործելով նաև հատուկ տեխնիկա, այդ հարցը լուծեց, բայց սպասվում են ակտիվ գործընթացներ։ Արդեն այս պահի դրությամբ խորհրդարանի նախագահը հրաժարական տվեց, և կարելի է ասել, որ իրավիճակի պատասխնատվությունը վերցնելով նա գնաց այդ քայլին»։
Մեր զրուցակիցը միևնույն ժամանակ նշեց՝ առաջիկա գործողությունները կախված են թե՛ ցուցարարներից և թե՛իշխանությունների արձագանքից։ Ինչ վերաբերում է Հայաստանի պատվիրակության դիրքորոշմանը, երբ նրանք այդ բախման ընթացքում լքել են դահլիճը, Ջոնի Մելիքյանը նշեց. «Քայլը ճիշտ էր, կոռեկտ, պետք չէ խառնվել այդ գործընթացներին։ Անվտանգության խնդիրներից ելնելով պետք էր հենց այդպես էլ վարվել, որովհետև իրավիճակը կարող էր ավելի լարվել, միջոցառումն էլ, ինչպես գիտեք, տեղի չունեցավ»։
Մելիքյանի դիտարկմամբ՝ Հայաստանն այս իրադարձություններում մասնակցություն չի ունենա. «Անցած տարվա ընթացքում տարբեր սոցիալական խնդիրների թեմաներով եղել են տարբեր ակցիաներ, և այստեղ կարևորն այն է, թե ընդդիմությունը որքանով կարող է օգտվել իրավիճակից և մաքսիմալ դիվիդենտներ քաղել։ Իրենց ցանկությունն է իշխանափոխությունը, բայց պետք է ռեալիստ լինենք ու հասկանանք, թե ինչքանով է այդ ամենը հնարավոր։ Դրա հավանականությունն, ըստ իս, բավականին ցածր է։ Քանի որ եկող տարի սպասվում են խորհրդարանական ընտրություններ, երևի թե իրավիճակը կհանդարտվի, ու քաղաքական կուսակցություններն ավելի կոնստրուկտիվ դաշտում կաշխատեն»։