«Ես զբոսաշրջության ոլորտում եմ դեռևս 2009 թվականից՝ հիմնադրել էի իմ մասնավոր կազմակերպությունը, որն առաջարկում էր տարբեր ծառայություններ։ Ինձ համար այն ժամանակ ոլորտը նոր էր, և փորձում էի հայտնաբերել նոր առաջարկություններ, ծառայություններ, որոնք հետաքրքրում են զբոսաշրջիկներին, որոնք տարբերվում էին արդեն իսկ իրենց բնույթով, ու հետաքրքրության աճին զուգահեռ մեծացավ իմ ներգրավվածությունը զբոսաշրջության ոլորտում։ Աստիճանաբար ծառայությունների շրջանակը մեծացնելով, հասկացա, որ զբոսաշրջությունն այն է, ինչով ես ուզում եմ զբաղվել։ Մասնավոր զբոսաշրջությամբ զբաղվել եմ երեք տարի, որից հետո անձնական պատճառներով ստիպված էի դադարեցնել գործունեությունը, բայց արդեն ինձ չէի պատկերացնում զբոսաշրջությունից դուրս։ Սկսեցի ավելի խոր ուսումնասիրել՝ աշխարհում ինչպես է զարգանում զբոսաշրջությունը, ինչպես են մարդիկ շփվում միմյանց հետ, ինչպես են ձեռք բերում տեղեկատվություն։ Ներգրավվեցի մի քանի արտասահմանյան ֆորումներում, որտեղ լուրջ քննարկում էր գնում զբոսաշրջային տարբեր խնդիրների շուրջ՝ վեր էին հանվում խնդիրներ, առաջարկվում էին լուծումներ։ Այդտեղ հասկացա, որ Հայաստանում չունենք նմանատիպ հարթակ, և նախաձեռնեցի ու ֆեյսբուքյան մի խումբ ստեղծեցի, որտեղ հավաքվեցին Հայաստանի բոլոր զբոսաշրջային ծառայություն մատուցողները»,- «Առաջին լրատվական»-ի հետ զրույցում ասաց Զբոսաշրջության պետական կոմիտեի նախագահ Սուսաննա Սաֆարյանը։
«Հաջորդ քայլը, որպես միջազգային կազմակերպություն, որտեղ սկսեցի աշխատել, դա այս պահին իրականացվող «Իմ Հայաստան» ծրագիրն էր։ Այնտեղ սկսեցի աշխատել, որպես տուրիզմի մասնագետ, արդեն հասկանալով, թե որոնք են խնդիրները տուրիզմի զարգացման բնագավառում։ Մոտ երկու տարի այնտեղ արդյունավետ աշխատելուց հետո տեղափոխվեցի մեկ այլ միջազգային կազմակերպություն՝ ՄԱԿ-ի զարգացման ծրագիր, որը մի փոքր այլ ուղղվածություն ուներ, և ավելի շատ էր համապատասխանում իմ ցանկություններին, նպատակներին»,- հավելեց Սուսաննա Սաֆարյանը։
Մանրամասները՝ տեսանյութում։
