Այսօր՝ հունիսի 21-ին, հրավիրվել է Ազգային ժողովի արտահերթ նիստ: Այժմ քննարկվում է Բարձրագույն դատական խորհրդի անդամի ընտրության հարցը: «Իմ քայլը» խմբակցությունը ԲԴԽ անդամի թեկնածու է առաջադրել Վիգեն Քոչարյանին:
«Քննարկում ենք ԲԴԽ 2-րդ անդամի թեկնածուի հարցը և պիտի կանգ առնենք հապճեպության վրա. մեզ համար անընդունելի է այսքան հապճեպ այս հարցին անդրադառնալը, որովհետև չափազանց կարևոր խնդիր ենք լուծում այս պահին: Այն ակնկալիքների ֆոնին, որ մենք ձևավորում ենք հասարակության մոտ, այս հապճեպությունը անհասկանալի է»,- հայտարարեց «Լուսավոր Հայաստան» խմբակցության պատգամավոր Արման Բաբաջանյանը:
Դիմելով թեկնածուին՝ պատգամավորն ասաց. «1998-2008թթ. եղել եք Իրավաբանների միության գործադիր տնօրեն, իսկ 2008-ից 2015-ը՝ այդ միության փոխնախագահը: Պարոն Քոչարյան, մենք վախեր ունենք, որովհետև ձեր պաշտոնավարման տարիներին ձեր լուռ ներկայությամբ և ինչ-որ իմաստով նաև մասնակցությամբ տեղի են ունեցել հանցագործություններ, մարդկանց վրա կարվել են գործեր, և ես չեմ հանդիպել որևէ հրապարակում, որտեղ Դուք որևէ ձևով վերաբերմունք եք ունեցել կամ վերապահում եք ունեցել օրվա իշխանությունների գործողությունների կապակցությամբ»:
Անդրադառնալով Վիգեն Քոչարյանի՝ արդարադատության նախկին նախարար Դավիթ Հարությունյանի տեղակալ լինելու հանգամանքին՝ Արման Բաբաջանյանն ասաց. «Ձեր անմիջական ղեկավարը այն անձն էր, ով 2008թ. մարտի 1-ի ոճրագործությունից հետո ԵԽԽՎ-ում ՀՀ պատվիրակության ղեկավարի պաշտոնում պետական գործչի փոխարեն ոճրագործի պես էր պահում սեփական երկրի ու սեփական պետության նկատմամբ»:
Կարևորելով կապերը՝ Արման Բաբաջանյանն ասաց. «Այն անձինք, որոնց հետ դուք կարող եք կապեր ունենալ, չունեն սոսկ ընկերական նշանակություն. դրանք կարող են ունենալ քաղաքական արժեք. մենք գիտենք, որ այդ շրջանակները կարող են ունենալ քաղաքական հավակնություններ և երախները սրած՝ սպասում են, որպեսզի Դուք այսօր մաս կազմեք ԲԴԽ-ին, որ իրենք սեփական «մարդ» ունենան ԲԴԽ-ում»:
Արման Բաբաջանյանը նկատեց, որ ԲԴԽ անդամությունը նաև խիզախություն է ենթադրում:
Մանրամասները՝ տեսանյութում: