Վրաստանի առողջապահության նախարարությունը հաղորդել է 240 տուժածների մասին, երբ հատուկջոկատայինները Թբիլիսիի կենտրոնում գտնվող խորհրդարանի շենքի դիմաց հանրահավաքի մասնակիցներին ցրելու համար արցունքաբեր գազ և ռետինե փամփուշտներ են կիրառել:
«Ընդհանուր առմամբ 240 մարդ է հոսպիտալացվել, որոնցից 80-ը ոստիկանության աշխատակիցներ են: Այս պահին երկու վիրահատություն է ընթանում: Տուժածներից մեկի վիճակը շարունակում է մնալ կայուն ծանր»,- լրագրողներին ասել է առողջապահության փոխնախարար Զազա Բոհուան:
Նա նշել է, որ Թբիլիսիի տարբեր հիվանդանոցներում դեռևս 102 տուժած է գտնվում: Նրանց մեծ մասը մարմնական և աչքի վնասվածքներով են: Կատարվում են անհրաժեշտ հետազոտություններ, նշել է Բոհուան:
Ինչպես նշվում է, Վրաստանի խորհրդարանի վրա գրոհը տեղի է ունեցել ՌԴ պետդումայի պատգամավոր Սերգեյ Գավրիլովի շուրջ սկանդալի ֆոնին: Հունիսի 20-ի առավոտյան նա հայտնվել է Վրաստանի խորհրդարանի նախագահի աթոռին, ինչը դժգոհություն է առաջացրել երկրի արմատականների շրջանում, որից հետո նիստն ընդհատվել է:
Երեկոյան արմատականները սկսել են խորհրդարանի գրոհը, նրանց է միացել ընդդիմությունը:
Ցուցարարները պահանջել են Վրաստանի խորհրդարանի նախագահ Իրակլի Կոբախիձեի հրաժարականը, ինչպես նաև արտահերթ ընտրությունների անցկացում:
Հատուկ նշանակության ջոկատները սկսել են ցրել Վրաստանի խորհրդարանի դիմաց անցկացվող հանրահավաքը:
Կիրառվել է ծխաբեր նռնակներ և արցունքաբեր գազ, ինչպես նաև ցուցարարների ուղղությամբ կրակ են բացել ռետինե փամփուշտներով:
Վրացական լրատվամիջոցների տվյալներով, լուսաբացին մի քանի տասնյակ մարդիկ են ձերբակալվել: Այսօր երեկոյան ընդդիմությունը մտադիր է վերսկսել բողոքի ակցիան:
