Այսօր խորհրդարանում իր երդման ժամանակ ՍԴ նորանշանակ դատավոր Վահե Գրիգորյանն ուշագրավ հայտարարություն արեց։ Գրիգորյանը հայտարարեց՝ երդում տալով որպես ՍԴ դատավոր՝ ինքը դառնալու է ՍԴ երկրորդ դատավորը։
«Դուք չեք սխալվում՝ լսելով այն, ինչ ես ասում եմ. ՍԴ-ում այս երդումը տալուց հետո լինելու եմ երկրորդ դատավորը, իսկ քվորումը պահանջում է առնվազն հինգ դատավոր որոշումներ կայացնելու համար։ Այդ բոլոր հարցերը քննարկման առարկա եմ դարձնելու իմ գործընկերների հետ»,- ասաց նա։
Գրիգորյանը նաև հայտարարեց, որ երդում տալուց հետո ստանձնելու է ՍԴ նախագահի լիազորությունների կատարումը։
«ՍԴ մուտք գործելիս, որպես այս պահի միակ դատավոր, քանի որ մյուս դատավորը բացակայում է այս օրերին և ստանձնելով ՍԴ նախագահի լիազորությունների և պարտականությունների կատարումը՝ ՍԴ անդամների հետ խնդիրը քննարկելուց հետո, նրանց համաձայնությամբ կամ համաձայնության բացակայության դեպքում, ընդունելի ձևաչափում կտեղեկացնեմ հանրությանը և իշխանության համապատասխան սահմանադրական մարմիներին, որոնք իրավասու են գործընթացում դերակատարություն ունենալ»,- ասաց նա։
«Առաջին լրատվական»-ը Սահմանադրական դատարանի դատավոր Ալվինա Գյուլումյանից հետաքրքրվեց՝ ինչպես է հասկանում Գրիգորյանի հայտարարությունը և ինչպես կարող է այն մեկնաբանել։ «Անկեղծ ասած, հայտարարությունը չեմ լսել, հետևաբար դժվար է ինձ համար մեկնաբանել։ Բայց ամեն դեպքում կարծիքներ հայտնողներին խորհուրդ եմ տալիս կարդալ Սահմանադրության անցումային դրույթները»,- ասաց տիկին Գյուլումյանը։
Մեր դիտարկմանը, որ Գրիգորյանը թերևս նկատի է ունեցել Սահմանադրության փոփոխությունները, ՍԴ դատավոր-ՍԴ անդամ հակասությունը և այն, որ նախորդները լեգիտմին եղանակով չեն ընտրվել, Գյուլումյանը պատասխանեց. «Ես մի քիչ չեմ ուզում քաղաքականության մեջ մտնել, իսկ դրանք, իմ կարծիքով, քաղաքական մոտեցումներ են»։
Ալվինա Գյուլումյանից հետաքրքրվեցինք նաև, թե ինչպես է պատկերացնում Վահե Գրիգորյանի հետ համատեղ աշխատանքը, քանի որ այս օրերին շատ է խոսվում, որ Վահե Գրիգորյանի՝ ՍԴ գնալուց հակասություններ կարող են առաջանալ ՍԴ հին անդամների, մասնավորապես՝ նախկին ՀՀԿ-ական պատգամավոր, ՍԴ նախագահ Հրայր Թովմասյանի հետ։ «Ես կարծում եմ, որ որևէ խնդիր չի կարող լինել։ Ես հարգում եմ իրեն՝ որպես մասնագետի, կարծում եմ, որ ինքն էլ ինձ է ճանաչում։ Ես կարծում եմ, որ ինձ հետ կապված որևէ խնդիր չի կարող առաջանալ։ Եվ ես կարող եմ պատասխանել միայն իմ փոխարեն»,- ասաց տիկին Գյուլումյանը։
ՍԴ դատավորից հետաքրքրվեցինք նաև, թե ինչպես է վերաբերում վեթինգի ինստիտուտին, որի վերաբերյալ ներկայումս նախագիծ է մշակվում և այն միտված է դատական համակարգի առողջացմանը։ Հարցին՝ պե՞տք է արդյոք վեթինգը վերաբերի նաև Սահմանադրական դատարանին, Գյուլումյանը պատասխանեց. «Ես չեմ կարող նաև այս մասով որևէ բան ասել, քանի որ այն ևս դիտարկում եմ քաղաքական մոտեցում։ Կլինի նախագիծը, կտեսնենք, թե ինչ է ենթադրում։ Ամեն դեպքում, եթե գտնեն, որ մենք էլ պետք է վեթինգ անցնենք՝ կանցնենք, ինչ է եղել որ, կենթարկվենք օրենքին։ Դա բացառապես քաղաքական մարմնի որոշման խնդիրն է, մերը չէ»։
Ալվինա Գյուլումյանից հետաքրքրվեցինք նաև՝ չե՞ն պատրաստվում արդյոք իրավիճակով պայմանավորված հետևել Բարձրագույն դատական խորհրդի անդամների օրինակին և հրաժարական ներկայանել։ «Ես չեմ պատրաստվում հետևելու այդ օրինակին։ Ես չեմ պատրաստվում հրաժարական տալ։ Կրկնում եմ, ես խոսում եմ միայն իմ փոխարեն»,- եզրափակեց մեր զրուցակիցը։