Լուրեր
Երիտասարդ մնալը ճիշտ ապրելուց է. մեր ազգը ուրախ ազգ է. Աշոտ Ղազարյան

Վաղուց ապացուցված է, որ ծիծաղը պաշտպանում է վախերից, լավագույն դեղամիջոցն է դեպրեսիայի դեմ և, առհասարակ, երկարացնում է կյանքը: Ծիծաղը՝ իբրև հասարակության երջանկության բաղադրատոմս. այս թեմայի շուրջ «Առաջին լրատվական»-ը զրուցեց ամենակենսուրախ համաքաղաքացիներից մեկի՝ դերասան, կատակերգու, երգիչ Աշոտ Ղազարյանի հետ:

Մեկը երջանիկ է խրճիթում, մյուսը դժբախտ է դղյակում. ինչո՞ւ է այդպես: Արդյո՞ք երջանկությունը հենց ընտրության հարց չէ՝ դու ես որոշում՝ ուզում ես երջանի՞կ լինել, թե՞ տխրել, ամեն ինչը վատ երանգներով տեսնել: Այս հարցերին ի պատասխան՝ Աշոտ Ղազարյանը նշեց, որ իսկապես կան մարդիկ, որոնք, չգիտես ինչու, սիրում են ամեն ինչը բարդացնել: «Խրճիթում կարելի է երջանիկ լինել, եթե այնտեղ սեր կա, հասկանալ կա, ծիծաղ կա ու կյանքը սիրել կա: Մարդ կա, ինչ էլ լինի ինքը դժգոհ է»:

Հետազոտություններ կան, որոնց համաձայն՝ ամեն ինչի մեջ լավը տեսնում են երիտասարդները, իսկ ամեն ինչում բացասականը տեսնում են հիմանականում մեծերը, տարիքի հետ նեգատիվը կուտակվում է: Անդրադառնալով այս դիտարկմանը՝ Աշոտ Ղազարյանը նշեց, որ ինքն այլ կարծիք ունի. «Չէի ասի, թե դա տարիքի հետ կապ ունի: Երիտասարդ կա, որ ամեն ինչից դժգոհ է, և մեծ էլ կա, որ ապրում է շատ ուրախ, թեթև: Մարդկային տեսակներ են, երևի գեներով է փոխանցվում կամ դաստիարակության հետ կապ ունի, կամ էլ կրթությամբ ու ապրելակերպով է պայմանավորված»:

«Կյանքը սկուտեղի վրա չի մատուցվում, ուրախ էլ կլինես, տխուր էլ, արև էլ կլինի, անձրև էլ… Երիտասարդ մնալը ճիշտ ապրելուց է: Մեր ազգը ուրախ ազգ է»,- ընդգծեց Աշոտ Ղազարյանը:

Մանրամասն՝ տեսանյութում:

  • Դիտումներ՝ *