Վերաքննիչ դատարանում ընթանում է ՀՀ երկրորդ նախագահ Ռոբերտ Քոչարյանի և մյուսների գործով բողոքների քննությունը: Բողոքները քննող դատավոր Արմեն Դանիելյանն արդեն մի քանի անգամ մերժել է իրեն ներկայացված ինքնաբացարկի միջնորդությունները։ Ի դեպ, դատավորին ինքնաբացարկի միջնորդություններ էին ներկայացրել թե՛ տուժողի իրավահաջորդի ներկայացուցիչը, թե՛ Ռոբերտ Քոչարյանի պաշտպանները։
Ինչպե՞ս հասկանանք այս իրավիճակը, երբ կողմերից որևէ մեկը չի վստահում դատավորին, նման տոտալ անվստահությունն ի՞նչ մտահոգությունների տեղիք կարող է տալ «Առաջին լրատվական»-ի հարցին ՀԱԿ Իրավական հանձնաժողովի անդամ Արմեն Խաչատրյանը պատասխանեց․ «Գիտեք, նման տոտալ անվստահություն միայն Արմեն Դանիելյանի նկատմամբ չի, այդ անվստահությունն ամբողջ դատական համակարգի նկատմամբ է։ Ես չէի զարմանա, որ ցանկացած դատավորի դեպքում կողմերը հանդես գային ինքնաբացարկի միջնորդությամբ։ Այսօր ինձ համար արդեն պարզ դարձավ, որ պաշտպանական կողմը հանդես է գալիս ոչ թե իրավական տեսանկյունից, այլ ավելի շատ սկսել է դատավարությունն արհեստական ձգձգել։ Մենք ինչո՞ւ էինք հանդես գալիս, որ դատարաններն այսօր լինեն այնպիսին, որ Մարտի 1-ից հետո տեղի ունեցած դատավարություններին առնչություն չունենան, որովհետև ցանկացած որոշման դեպքում, միևնույն է, այդ դատավորը մեր մոտ ուղղակի առնչություն ունի քաղաքական հետապնդումների, քաղաքական որոշումների հետ»։
Իսկ իրավապաշտպան Արթուր Սաքունցն ասաց․ «Ես, իհարկե, լիովին համաձայն եմ դատական իշխանության՝ տարիներ շարունակ ձևավորված այդ անմխիթար վիճակի հետ, որովհետև ինչպես ենք պատկերացնում՝ նացիստական Գերմանիայի ղեկավարներին դատեր գերմանական դատարանը։ Իհարկե, դատավարության մասնակիցների պատասխանատվությունը շատ մեծ է, բայց ամեն դեպքում, պաշտպանական կողմն ի՞նչ գնահատման ցուցանիշներով է առաջնորդվում, որ Արմեն Դանիելյանի վարկանիշը համարում է ցածր»։
Մանրամասները՝ տեսանյութում։
