Apple ամերիկյան կորպորացիան դիտարկում է Չինաստանից այլ երկրներ իր արտադրական հզորությունների 15-ից մինչև 30 տոկոսը տեղափոխելու տարբերակը՝ կապված Վաշինգտոնի և Տոկիոյի միջև առևտրական վեճերի սաստկանալու հետ: Այդ մասին հունիսի 19-ին հայտնել է Nikkei թերթը: Հրատարակության աղբյուրների տեղեկությունների համաձայն՝ ընկերության ղեկավարությունը համապատասխան խնդրանքով դիմել է իր հիմնական մատակարարներին:
Նրանց թվում են՝ Foxconn-ը, Pegatron-ը, Wistron-ը, Quanta Computer-ը, Compal Electronics-ը, Inventec-ը: Նրանց առջև խնդիր է դրվել գնահատել Չինաստանից այլ երկրներ, մասնավորապես, Վիետնամ, Հնդկաստան, Ինդոնեզիա, Մալայզիա և Մեքսիկա, արտադրության հնարավոր տեղափոխման ծախսերը, ինչպես նաև վերլուծել այնտեղ բիզնես վարելու հեռանկարները: Թերթը նշում է, որ Apple-ի ամբողջ արտադրանքի մոտավորապես 90 տոկոսը հավաքվում է մայրցամաքային Չինաստանում և Հոնկոնգում: Ընդ որում՝ այդ ցուցանիշները վերջին ժամանակներս միայն աճել են: Այսպես, անցյալ տարի Չինաստանն առաջին անգամ ԱՄՆ-ից ու Ճապոնիայից առաջ է անցել ամերիկյան տեխնոլոգիական հսկայի մատակարարների թվաքանակով: Ներկայում Չինաստանում նման ընկերությունների թիվը 41-ն է: Չինաստանում Apple-ի հետ այս կամ այն կերպ կապված աշխատատեղերի թվաքանակը հասել է 5 միլիոնի: Դրանցից 1,8 մլն մարդ զբաղված է iOS օպերացիոն համակարգի համար ծրագրային ապահովման և հավելվածների մշակմամբ:
