Հունիսի 17-ին, ՀՅԴ Հայաստանի Գերագույն մարմնի նախաձեռնությամբ, «Բարգավաճ Հայաստան» կուսակցության ղեկավարության հետ տեղի է ունեցել միջկուսակցական հանդիպում:
ՀՅԴ գրասենյակից հայտնում են, որ քննարկվել է փոխադարձ հետաքրքրություն ներկայացնող հարցերի լայն շրջանակ, մասնավորապես անդրադարձ է կատարվել ներքաղաքական և արտաքին քաղաքական ներկայիս իրավիճակին ու ընթացիկ զարգացումներին: Կողմերը ծանոթացել են քաղաքական հետաքրքրություն ներկայացնող հարցերի վերաբերյալ երկուստեք առկա դիրքորոշումներին:
Կուսակցության տարածած հաղորդագրության մեջ նաև նշվում է, որ ՀՅԴ Հայաստանի Գերագույն մարմինը շարունակում է քաղաքական խորհրդակցությունների շարքը հանրային հետաքրքրություն ներկայացնող և երկրի հասարակական ու քաղաքական կյանքի համար կարևոր հարցերի համատեքստում:
Քաղտեխնոլոգ Վիգեն Հակոբյանն «Առաջին լրատվական»-ի հետ զրույցում նշեց՝ ԲՀԿ-ն ռեսուրսային կուսակցություն է՝ թե՛ ֆինանսական, թե մարդկանց և թե՛ կառույցների առումով. «ԲՀԿ-ի այսօրվա կարգավիճակը, որը ֆորմալ առումով ընդդիմություն է, այնուամենայնիվ, զուսպ ընդդիմություն է։ Շատ շատերը կուզենային, որ ԲՀԿ-ն ավելի ազատ լողար, ու նրանք ԲՀԿ-ին իրենց կողմը քաշեին ու մի թիմով հանդես գային։ Դաշնակցությունը իր քաղաքական կոնսուլտացիաները հենց այս պատճառներից ելնելով էլ ԲՀԿ-ից սկսեց, բայց ես նաև չեմ կարծում, որ այս հանդիպման ընթացքում ինչ-որ ցնցող որոշումներ են ընդունվել»։
Հակոբյանը կարծում է, որ այս հանդիպման ընթացքում կողմերը պարզապես շոշափել են իրար. «Եվ, նախ և առաջ, հենց Դաշնակցությունը ուզում է տեսնել ԲՀԿ-ի հնարավոր գործողությունների մարժան, որտեղ են այն կարմիր գծերը, որից հետո ԲՀԿ-ն վարքագիծ կարող է փոխել։ Ի վերջո` երկուսի համար էլ շատ կարևոր էր քաղաքական դաշտում միկրոիրավիճակ ստեղծել, որպեսզի ցույց տան նոր ռեսուրսներ՝ մեկի համար բանակցային նոր ռեսուրս, ցույց տա, որ հնարավոր դաշնակիցներ կարող է ունենալ քաղաքական տորգերի համար, մյուսի համար՝ իր ռեսուրսներն ավելացնելու հնարավորություն է կամ առնվազն PR։ Սա առաջին հանդիպումն էր և ես կարծում եմ, որ առաջիկայում մենք որոշակի պարբերականությամբ կլսենք Դաշնակցության և այլ ուժերի հանդիպման մասին»։
Քաղտեխնոլոգը միևնույն ժամանակ շեշտեց՝ այս հանդիպման ընթացքում պայմանավորվածություններ, որպես այդպիսին, հազիվ թե եղած լինեն. «Լավագույն դեպքում, կոնսուլտացիաները շարունակելու պայմանավորվածություն է եղել»։
Իսկ արդյոք ԲՀԿ-ին ձեռնտու կլինի այս փուլում հակադրվել գործող իշխանություններին, հարցին ի պատասխան մեր զրուցակիցը պատասխանեց. «Ես կարծում եմ՝ ԲՀԿ-ն այս պահի դրությամբ նման մտադրություն չունի, եթե, իհարկե, օրվա իշխանությունը չդրդի նման քայլի՝ տարբեր մեթոդներով ու քայլերով։ Ըստ իս՝ ԲՀԿ-ն նման պլաններ չունի, եթե քաղաքական տրամաբանությունից ենք դուրս գալիս, ապա այս պահին վարչապետ Փաշինյանն էլ պետք է, որ շատ ռադիկալ տրամադրություններ չունենա ԲՀԿ-ի նկատմամբ, որովհետև, այնուամենայնիվ, ԲՀԿ-ի նման ռեսուրսային կառույցին ավելի ձեռք է տալիս մոտ պահել, քան թողնել ազատ լողա ու քեզ հակառակորդ դառնա»։
Քաղաքագետ Գագիկ Համբարյանն, «Առաջին լրատվական»-ի հետ զրույցում անդրադառնալով հանդիպմանը, նշեց. «Հայաստանում քաղաքական գործընթացները բավականին ակտիվ են զարգանում, և քաղաքական ուժերը, որոնք դուրս են մնացել խորհրդարանից, փորձում են համագործակցության եզրեր գտնել այն քաղաքական ուժերի հետ, որոնք գտնվում են խորհրդարանում։ Ընդհանուր առմամբ պետք է նշել, որ Աբովյանում տեղի ունեցած ընտրություններից հետո, ես որքան նկատում եմ, քաղաքական ուժերը բավականին ակտիվացել են և հենց այս կոնտեքստում էլ ես տեսնում եմ ՀՅԴ և ԲՀԿ ներկայացուցիչների հանդիպումը»։
Այն հանգամանքը, որ ՀՅԴ-ն վերջին շրջանում բացահայտ սուր ընդդիմություն է ներկայանում՝ ինտրիգներ է մտցնում այս հանդիպման մեջ. «ԲՀԿ և ՀՅԴ հանդիպումն այս կոնտեքստում հետաքրքիր է ստացվում։ Հաշվի առնենք, որ ԲՀԿ-ն շատ զգույշ է այլ ուժերի հետ համագործակցության առումով։ Հստակ պետք է նշել նաև, որ երկու կուսակցությունների միջև կա նաև գաղափարախոսական տարբերություն»։
Գագիկ Համբարյանի դիտարկմամբ՝ այս փուլում ԲՀԿ-ն կտրուկ շրջադարձ կկատարի իր վարած քաղաքականության մեջ. «Բայց նաև չի էլ բացառվում, որ Հայաստանում տեղի ունեցող ակտիվ գործընթացների համատեքստում ԲՀԿ-ն կարող է փոխել իր համագործակցության ֆորմատը ու համագործակցի ոչ միայն ՀՅԴ-ի, այլ նաև այլ ուժերի հետ։ Նորից եմ կրկնում՝ այս փուլում քաղաքական գործընթացները բավականին ակտիվ են զարգանում»։
