Քաղաքապետ Հայկ Մարությանը նախօրեին հայտարարել է, որ տրանսպորտային նոր ցանցի վերջնական փաթեթն արդեն ուղարկվել է կառավարություն, բայց ցանցի ներդրման համար առնվազն 2 տարի ժամանակ է պետք: «Իմ մոտեցումն է, որ Երևանի տրանսպորտը լինի համայնքային: Եթե ոչ 100 տոկոս, ապա 50 տոկոսից ավելին: Պետությունը պետք է անի, որպեսզի մաքսիմալ էժան լինի: 20 տարի տրանսպորտային ցանցը չի փոխվել, դուք ուզում եք՝ 2-3 ամսում լինի, սա մեծ աշխատանք է, որը մեր թիմը կատարում է: Արդեն մենք պատրաստ ենք, որպեսզի վերջնական փուլ մտնենք: Եվ ուզում եմ ընդգծել, որ նախընտրական ծրագիրը ես և իմ թիմը ներկայացրել ենք 5 տարվա համար: Այսինքն՝ 5 տարվա ընթացքում պետք է լինեն խոստումները»,- ասաց նա:
Քաղաքապետի տեղակալ Հրաչյա Սարգսյանի խոսքերով՝ համաձայն քաղաքի նոր տրասնպորտային ցանցի, Երևան քաղաքում գործելու է 820 ավտոբուս, որոնից 216՝ 18 մետրանոց, 480-ը՝ 7.5-8 մետրանոց, և 29 ավտոբուս՝ 12 մետրանոց։ Ավտոբուսները սպասարկելու են ամբողջ Երևան համայնքը։ Լինելու են 11 հիմնական և 30 սնուցող գծեր։ Այսինքն՝ շատ դեպքերում քաղաքացիները իրենց ցանկալի տեղ հասնելու համար պետք է մի ավտոբուսից իջնեն և նստեն ուրիշը։ Ներդրվելու է ամբողջությամբ նոր երթուղային ցանց, գործելու է միասնական տոմսային համակարգ։
Քաղաքապետարանի պաշտոնյաների խոսքերով՝ գործընթացի ուշացումը պայմանավորված է գնումների, 820 ավտոբուսների կառուցումը, որի համար արտադրողին, փոխքաղաքապետի խոսքերով, պետք է ժամանակ տալ։
Երևանի ավագանու ընդդիմադիր «Լույս» խմբակցության ղեկավար Դավիթ Խաժակյանն, «Առաջին լրատվական»-ի հետ զրույցում անդրադառնալով այս գործընթացներին, նկատեց, որ քաղաքապետարանի պաշտոնյաները՝ սկսած քաղաքապետից, բարեփոխումների համար բավականաչափ մեծ ժամկետներ են նշում։ «Ակնհայտ է, որ իրենց կողմից նշված ժամկետները բավականաչափ մեծ են, և իրենք պետք է ամեն ինչ անեն այդ ժամկետներում ծրագիրը կյանքի կոչելու համար»,- ասաց Խաժակյանը։
Անդրադառնալով քաղաքապետի դիտարկմանը, թե իր մոտեցումն այն է, որ Երևանի տրանսպորտը լինի համայնքային, ավագանու ընդդիմադիր անդամը նշեց, որ սա որոշակի առումով ռիսկային է, երբ ամբողջ տրանսպորտային համակարգը լինի համայնքային, քանի որ այսօր էլ Երևան համայնքը բավականին մեծ մասնաբաժին ունի՝ ի դեմս «Երևան Ավտոբուս» ՓԲԸ-ի և այնպես չէ, որ որակական առումով ավելի լավ ծառայություն են մատուցում։ «Հիմա իրենք շահագործում են «Երևան Ավտոբուս» ՓԲԸ-ն, բայց որակական առումով ոչ մի առավելություն տեսանելի չէ, ոչ էլ տեսանելի է մասնավորի համեմատ ավելի լավ կառավարելը։ Ես կարծում եմ, որ այդ գործառույթը պետք է իրականացնի միջազգային մրցույթով հաղթած միջազգային օպերատորը, որն ունի փորձառություն՝ այդ աշխատանքն անելու։ Քաղաքապետարանն այդ ոլորտում նման ծառայություն մատուցելու լավ փորձառություն չունի»,- ընդգծեց Դավիթ Խաժակյանը։
Նշենք, որ Երևան քաղաքի հասարակական տրանսպորտի նոր ցանցի վերջնական նախագծի շուրջ ավելի վաղ, ամիսներ շարունակ քննարկումներ են եղել հանրային տրանսպորտի բարեփոխումների մասնագիտական աշխատանքային խմբի շրջանակում: Աշխատանքային խմբում ներգրավված էին քաղաքապետարանի աշխատակիցներ, Երևանի ավագանու անդամներ, հասարակության ներկայացուցիչներ, փորձագետներ, ովքեր ներկայացրել էին նաև իրենց առաջարկներն ու դիտարկումները նոր երթուղային ցանցի սպասարկման, նախատեսվող ավտոբուսների տեխնիկական հնարավորությունների, սակագնի հաշվարկման, էլեկտրատրանսպորտի զարգացման, մասնավորապես տրոլեյբուսների ցանցի արդիականացման և մի շարք այլ հարցերի վերաբերյալ:
Նշենք, որ ներկայումս գործող 111 ավտոբուսային երթուղու փոխարեն տրանսպորտային նոր ցանցով առաջարկվում է 42-ը, էապես կնվազի նաև տրանսպորտային միջոցների քանակը: Ինչպես արդեն նշեցինք, կգործարկվի 845 ավտոբուս և 101 տրոլեյբուս: Ավտոբուսների քանակի մեջ ներառված են նաև պահուստային միջոցները, որոնք ընդհանուրի 15 տոկոսն են կազմելու: Ավելի քան երեք անգամ կրճատվելու է նաև ցանցի երկարությունը: Ըստ քաղաքապետարանի, սա չի նշանակում, որ նվազելու է ծածկույթը, պարզապես նվազելու են կրկնվող գծերը: Սրա շնորհիվ հնարավորություն կլինի ցանցի կիրառման և շահագործման ընթացքում լուրջ խնայողություններ անել, ինչն էապես կթեթևացնի սակագնային բեռը:
Տրանսպորտային նոր ցանցի նախագծումն իրականացրել է WYG խորհրդատվական ընկերությունը։
Լուսանկարը՝ Armeniasputnik-ի