Լուրեր
Քաղաքում հասունանում է խոլերա․ ընդդիմությունն ահազանգում է, իշխանությունը հորդորում՝ «մի փոքր սպասել»
  • 18:58
  • 2019-06-18
  • Դիտումներ՝ *

Երևանի ավագանու արտահերթ նիստը, որի ընթացքում քննարկվեց քաղաքապետարանին կից նորաստեղծ «Երևանի աղբահանություն և սանիտարական մաքրում» համայնքային հիմնարկի հաստիքացուցակը, թեժ մթնոլորտում անցավ։

Գործող իշխանության և ընդդիմության հետ միասին հարցերը քննարկելու և ընդհանուր հայտարարի գալու մշակույթը, կարծես թե, այսօր դրված չէ օրակարգում։ Արդեն սովորական է դարձել, որ Երևանի ավագանու նիստերն անցնում են թեժ մթնոլորտում։ Ի՞նչն է խնդիրը, որ իշխող կուսակցության և ընդդիմադիր խմբակցության ավագանու ներկայացուցիչները չեն կարողանում գալ ընդհանուր հայտարարի, և այսպիսի թեժ տեսարանների ականատեսն ենք դառնում «Առաջին լրատվական»-ի հարցին Երևանի ավագանու ԲՀԿ խմբակցության քարտուղար Հռիփսիմե Առաքելյանը պատասխանեց․ «Ի սկզբանե, երբ ավագանու առաջին նիստը տեղի ունեցավ քաղաքապետն այսպիսի հայտարարություն արեց՝ «Մենք մի թիմ ենք և պետք է աշխատենք միայն կառուցողական չափորոշիչների շրջանակում»։ Ես կարող եմ փաստել, որ այս պահին գործադիր քաղաքային իշխանության մի շարք վրիպումների արդյունքում է, որ այսօր այսպես է եղել։ Երբ քաղաքային իշխանության պատասխանատուները մտածում են, որ իրենք 81-82 տոկոս ձայնով ներկայացնում են երևանցու քվեն և իրենց առաջարկած ծրագրերով պետք է առաջնորդվենք։ Կան շատ հարցեր, որոշումներ, որոնք առանց քննարկման իրենք անում են, սակայն այդ կառուցողականությունը, ես՝ որպես ավագանու անդամ, չեմ տեսնում»։

Երևանի ավագանու «Իմ քայլը» խմբակցության անդամ Արմեն Գալջյանն ասաց․ «Գիտեք՝ ընդդիմությունն աղմուկ է հանում միայն ավագանու նիստերի ժամանակ։ Քաղաքացիները նիստերի հեռարձակման միջոցով քաղաքապետարանի աշխատանքն ամսվա մեջ տեսնում են միայն մի քանի ժամ, և այնպիսի տպավորություն է, որ քաղաքապետարանը չի գործում, կամ քաղաքապետը չի գործում։ Բայց իրականում այդպես չէ։ Ընդդիմադիրները կոնստրուկտիվ քննարկման չեն գնում, և այսքան ժամանակ ես ընդդիմության կողմից չեմ տեսել որևէ առաջարկ, որը կնպաստի քաղաքի զարգացմանը»։

Իսկ Երևանի ավագանու «Լույս» խմբակցության ղեկավար Դավիթ Խաժակյանն էլ հավելեց․ «Ինչ վերաբերում է նրան, որ մենք քաղաքին նպաստող առաջարկություններ չենք ներկայացնում, ապա ասեմ, որ երեկ մենք և ԲՀԿ խմբակցությունը ներկայացրել էինք քաղաքի շահերին «հակասող» առաջարկ, որով քաղաքապետի 7 խորհրդականների փոխարեն առաջարկում էինք 4-ը։ Առաջարկը չընդունվեց, որովհետև այդ դեպքում քաղաքի գործունեությունը «կաթվածահար» կլինի»։

 

 

Մանրամասները՝ տեսանյութում։

  • Դիտումներ՝ *