Այսօր՝ հունիսի 18-ին, Ազգային ժողովում հրավիրել է 7-րդ գումարման 2-րդ նստաշրջանը: ԱԺ պատգամավորների հայտարարությունների ժամին տնտեսական հարցերով հանձնաժողովի նախագահ Բաբկեն Թունյանն իր խոսքը հղեց գործադիրի իրենց որոշ գործընկերների:
Նա նշեց, որ մի սփյուռքահայ գործարար պատրաստվում է Հայաստանում խոշոր՝ մի քանի միլիոն դոլարի հասնող ներդրում կատարել. «Այդ մարդն արդեն որոշակի քայլեր է կատարել և պատրաստվում է զբաղվել արտադրությամբ ու արտահանել եվրասիական շուկա: Մի քանի ամիս է՝ այս մարդու գործը կանգնած է փոքր տեխնիկական խնդրի պատճառով. ցանկության դեպքում այդ խնդիրը 20 րոպեում կլուծվեր»:
Բաբկեն Թունյանի տպավորությամբ՝ որոշ պետական պաշտոնյաներ իրենց գործառույթները լավ չեն պատկերացնում. «Նրանք բառի ամենավատ իմաստով բյուրոկրատներ են և պատասխանատվություն չեն կրում իրենց անգործության համար: Այդպիսի պաշտոնյաները նոր Հայաստանի պետական համակարգում պիտի տեղ չունենան»:
Պատգամավորը ընդգծեց, որ ինքը հրապարակային է խոսում այդ մասին, որպեսզի մեսիջը տեղ հասնի. «Եվ ուզում եմ իմանան՝ մենք այդ հարցում հետևողական ենք լինելու: Մենք խոստանում ենք խնդիրներ ստեղծել այն պաշտոնյաների համար, ովքեր խնդիրներ են ստեղծում օրենքով աշխատող գործարարների համար»:
Մանրամասները՝ տեսանյութում:
