Այսօր՝ հունիսի 18-ին, Ազգային ժողովում հրավիրել է 7-րդ գումարման 2-րդ նստաշրջանը: ԱԺ պատգամավորների հայտարարությունների ժամին «Լուսավոր Հայաստան» խմբակցության պատգամավոր Արման Բաբաջանյանը անդրադարձավ օգոստոսի 6-ին մեկնարկելիք Համահայկական 7-րդ խաղերին:
«Համահայկական խաղերը Հայաստանում և Արցախում են մեկտեղում տասնյակ հարյուրավոր մեր հայրենակիցների: Այսպիսով՝ այդ միջոցառումը դառնում է համազգային նշանակության իրադարձություն, որին պետք է վերաբերվել ամենայն պատասխաանտվությամբ: Սակայն մենք թույլ ենք տալիս այնպիսի բացթողումներ ու սխալներ, որոնք ստվերում են Համահայկական խաղերի նշանակությունն ու անգամ օրինականությունը»,- հայտարարեց պատգամավորը:
Նրա խոսքով՝ Համահայկական խաղերի կազմկոմիտեի ղեկավար Իշխան Զաքարյանը նախորդ հանցավոր ռեժիմի կարկառուն ներկայացուցիչներից մեկն է. «Նա Ռոբերտ Քոչարյանի իշխանության ամենաառանցքային դերակատարներից մեկն է և նույնը շարունակել է նաև Սերժ Սարգսյանի իշխանավարման ժամանակահատվածում: Իշխան Զաքարյանը քրեաօլիգարխիկ համակարգի կենդանի մարմնավորումն է, հին Հայաստանի հակապետական դեմքերից մեկը, և անթույլատրելի է, որ նման արատավոր գործիչը նոր Հայաստանում զբաղվի որևէ պատասխանատու գործով»:
Արման Բաբաջանյանը ընդգծեց՝ ՀՀ քաղաքացիների և Սփյուռքի մեր հայրենակիցների նկատմամբ վիրավորանք է այն, թե ինչպես է պետությունը՝ ի դեմս փոխվարչապետի, ընդունում Իշխան Զաքարյանին. «Իշխան Զաքարյանին այդ պաշտոնում աշխատելու հնարավորություն տալով՝ մենք ակամայից պետական կառավարման համակարգ, Հայաստան-Սփյուռք հարաբերությունների տիրույթ ենք բերում քրեաօլիգարխիկ բարքերն ու հանցավորությունը»:
Պատգամավորը հիշեցրեց, որ Իշխան Զաքարյանը մեկն էր այն անձանցից, ով 1 տարի առաջ ստորագրեց Ռոբերտ Քոչարյանի խափանման միջոցը փոխելու միջնորդությունը. «Գուցե ի դեմս Իշխան Զաքարյանի՝ գործ ունենք հին ու նոր Հայաստանների մի յուրօրինակ հաշտության, քոչարյանականությանը տրված ինդուլգենցիայի հե՞տ: Ուզում եմ հավատալ, որ՝ ոչ: Սակայն այդ տպավորությունը ցրելու համար Իշխան Զաքարյանը պետք է օր առաջ հեռացվի այդ համահայկական կառույցի ղեկավարի պաշտոնից»:
Արման Բաբաջանյանը կոչ արեց գործուն քայլեր ձեռնարկել և Համահայկական խաղերին ներկայանալ արժանի անձով. «Այլապես ստիպված կլինենք արձանագրել, որ ապրում ենք տեղ-տեղ՝ նոր, տեղ-տեղ հին Հայաստանում, որտեղ հանցագործները ոչ միայն չեն պատժվում, այլև զբաղեցնում են պատասխանատու դիրքեր»:
Մանրամասները՝ տեսանյութում:
