Այսօր՝ հունիսի 18-ին, Ազգային ժողովում հրավիրել է 7-րդ գումարման 2-րդ նստաշրջանը: Այժմ քննարկվում է Սահմանադրական դատարանի դատավորի ընտրության հարցը: ՀՀ նախագահը ՍԴ դատավորի թափուր տեղի համար առաջադրել է Վահե Գրիգորյանի թեկնածությունը:
«Լուսավոր Հայաստան» խմբակցության պատգամավոր Տարոն Սիմոնյանը նշեց, որ պարոն Գրիգորյանին ինքը վաղուց է ճանաչում. «Նրա մասնագիտական գիտելիքները չափազանց բարձր են, նրա անցած ճանապարհը ուսանելի է, բայց… եթե անգամ պարոն Գրիգորյանի տեղում իմ եղբայրը նստած լիներ, ես նրան կասեի՝ դու իմ եղբայրն ես, բայց ճշմարտությունը առավել է»:
Նրա խոսքով՝ իրավական պետությունը միայն գաղափար չէ. «Իրավական պետությունը ճանապարհ է, և այդ ճանապարհը պետք է օրենքով սահմանված կարգով անցնել»:
Տարոն Սիմոնյանը նշեց՝ իրավաբանությունը, ասում են, արվեստ է բարու և արդարության մասին, իսկ քաղաքականությունը հնարավորի մասին արվեստ է. «Վտանգավոր է խառնել այս երկու երևույթները. հնարավոր է անցնել բարու և արդարության սահմանը»:
Նա նշեց, որ անտեսել օրենքի պահանջը և գնալ քաղաքական որոշման՝ իրավական պետության տանող լավագույն ճանապարհը չէ. «Ես ձեզ խորհուրդ եմ տվել սպասել 1 տարի, առանց օրենքի դրույթները խախտելու ընտրել ՍԴ անդամ: Բայց դա էլ չնտրեցիք: Ինչպե՞ս ձեզ օգնեմ. բոլոր տարբերակներից ընտրել եք վատագույնը, մինչդեռ ունեիք հնարավորություն այլ ճանապարհով գնալու: Եվ ինչքան էլ հարգենք պարոն Գրիգորյանի անցած ճանապարհը, ես և իմ գործընկերներից շատերը չենք կարող անտեսել օրենքի պահանջը»:
Մանրամասները՝ տեսանյութում: