Քաղաքագետ Լևոն Շիրինյանն «Առաջին լրատվական»-ի հետ զրույցում անդրադառնալով իշխող քաղաքական ուժի՝ հունիսի 16-ին տեղի ունեցած համաժողովին, ընդգծեց. «Վարչապետի գաղափարական ազդեցությունը՝ և՛ կուսակցության, և՛ ժողովրդի վրա, բացառիկ է և ակնհայտ: Վարչապետն ասաց, որ գաղափարախոսություն չունեն, բայց հռչակեց պետականաշինության դոկտրին՝ կազմված 4 կետից»:
Հիշեցնենք՝ վարչապետ Նիկոլ Փաշինյանը համաժողովին իր ելույթում նշեց. «…Մենք մեզ դուրս ենք դնում գաղափարախոսական ստանդարտներից և ձևավորում ենք գաղափարական նոր հարթություն, որը հիմնված 4 առանցքային սյուների վրա՝ պետականություն, քաղաքացիություն, ազգային ինքնություն, անհատականություն»:
«Սա նշանակում է, որ բոլոր զազրախոսությունները ջուրն են լցվում. հստակ արտահայտվեց այն իդեալը, որն ունի այդ քաղաքական ուժը»,- նշեց քաղաքագետը՝ հավելելով, որ, այնուամենայնիվ, կուսակցությունն ունի գաղափարախոսություն կամ աշխարհայացք: Նրա խոսքով՝ ամբողջ աշխարհում «իզմերից» հրաժարվելու միտում է նկատվում, բայց գաղափարախոսությունից հրաժարվել հնարավոր չէ:
Խոսելով բացթողումներից՝ քաղաքագետը նշեց. «Մեզ այլևս չեն բավարարում ընդհանրական հայտարարությունները: Երկիրը ճգնաժամային վիճակ է ապրում, տեսնում եք՝ քրեաօլիգարխիկ գողապետությունը ինչպես է դիմադրում: Մեզ պետք են հստակ հռչակագրեր, թե որ ոլորտում ինչ է արվելու… Պետականաշինությունն ավելի դժվար գործ է, քան հեղափոխություն անելը»:
Շիրինյանի խոսքով՝ առանց դատական համակարգը վերափոխելու ոչինչ չի լինի. «Եթե ուզում ենք իրավական պետություն ունենալ, այդ պետության մեխը դատական համակարգն է: Դատական համակարգում կա մի հիմնական օղակ, որը վատթարագույն, հակապետական գործունեություն է ծավալել, լեգիտիմացրել է ընտրությունները, նաև Մարտի 1-ի ոճիրը, դա Սահմանադրական դատարանն է, որն իշխանության «կույրաղիքն» է եղել, դակել է, լեգիտիմացրել ընտրությունները: Սահմանադրական դատարանի դատավորները հիմա տեղավորվում են տարբեր տեղեր՝ ապականությունը տարածում են… Համակարգը պետք է համալրել երիտասարդ կադրերով»:
Անդրադառնալով դեսպանի հետ Քոչարյանի հանդիպմանը, Լ. Շիրինյանն ընդգծեց. «Ռուսաստանն իր վատ գործն արեց դեսպանի միջոցով… Բ. Սահակյանը և Ա. Ղուկասյանը միջամտեցին Հայաստանի դատական գործընթացին և դատական քաոս առաջացրին: Ալիքը կարծես իջնում էր, և ՌԴ դեսպանի հետ հանդիպումը եղավ… Կարող եմ ասել, որ նրանք համագործակցում են, միջամտում Հայաստանում ընթացող քաղաքական գործընթացին… Նպատակը մեկն է. թույլ չտալ Հայաստանի պետականության կայացումը…»:
Պատասխանելով հարցին, թե ինչու է թիրախավորվում նախագահ Արմեն Սարգսյանը, քաղաքագետն ընդգծեց. «Նախկին գողապետական իշխանությունը փորձում է «փչացնել» նախագահին…»:
Մանրամասն՝ տեսանյութում: