Միացյալ Նահանգների պաշտպանության նախարար Ռոբերտ Գեյթսը անհանգստություն է հայտնել այն հետևանքների կապակցությամբ, որոնք, ըստ նրա, կարող են առաջանալ, եթե Սենատը չվավերացնի հարձակողական ռազմավարական սպառազինության կրճատման մասին ռուս – ամերիկյան պայմանագիրը:
Associated Press լրատվական գործակալության փոխանցմամբ` Գեյթսը հայտարարել է, որ պայմանագիրը չվավերացնելուց կտուժեն հենց հանրապետականները: Նա պարզաբանել է, որ այդ դեպքում երկրի միջուկային համակարգի արդիականացման համար հանրապետական սենատորների պահանջած գումարները կարող են մեծ ռիսկի ենթարկվել: «Պայմանագրի ձախողումը կհանգեցնի նրան, որ Վաշինգտոնը, անկասկած, ավելի ու ավելի քիչ տեղեկություն կունենա Ռուսաստանի միջուկային ծրագրերի մասին, քանի որ տեղում դիտորդներ չեն լինի», – ասել է Պենտագոնի ղեկավարը:
Պայմանագրի վավերացման համար անհրաժեշտ է 100 սենատորներից առնվազն 67-ի աջակցությունը, իսկ իշխող Դեմոկրատական կուսակցության ներկայացուցիչների թիվը ներկայիս Սենատում 59-ն է:
