Անկարան պատասխան միջոցներ կկիրառի, եթե ԱՄՆ-ը Թուրքիայի նկատմամբ պատժամիջոցներ սահմանի ռուսական C-400 զենիթահրթիռային համակարգերի ձեռքբերման պատճառով: Այս մասին հայտարարել է Թուրքիայի արտաքին գործերի նախարար Մևլյութ Չավուշօղլուն, հաղորդում է Anadolu-ն:
Գերատեսչության ղեկավարը շեշտել է, որ այս փուլում պայմանագրից հրաժարվելը պարզապես անհնար է և չի քննարկվում: «Մենք պատրաստ ենք ցանկացած գին վճարել»,- ասել է Չավուշօղլուն:
Դիվանագետը հավելել է, որ ՀՕՊ համակարգը որևէ վտանգ չի ներկայացնում ՆԱՏՕ-ի համար:
Հունիսի 12-ին Թուրքիայի նախագահ Ռեջեփ Թայիփ Էրդողանը հաստատել է, որ ռուսական C-400 զենիթահրթիռային համակարգերը կմատակարարվեն հուլիսին:
Ամերիկացիները մի քանի անգամ վերջնագիր են ներկայացրել թուրքական կողմին. եթե Անկարան չհրաժարվի ռուսական համակարգերի ձեռքբերումից, ապա Վաշինգթոնը կչեղարկի հինգերորդ սերնդի F-35 կործանիչների մատակարարումը Թուրքիա: Միացյալ Նահանգներում և ՆԱՏՕ-ի անդամ այլ երկրներում մտավախություն ունեն, որ եթե Թուրքիան զինված լինի և՛ C-400-ով, և՛ F-35-ով, ապա ռուսական ռադարային համակարգերը կսովորեն հայտնաբերել և հետևել ամերիկյան կործանիչներին:
C-400-ի չորս ստորաբաժանման մատակարարման մասին համաձայնագիրը կնքվել է 2017-ի սեպտեմբերին: Գործարքի արժեքը 2.5 միլիարդ դոլար է, այդ գումարի կեսը կփակի ռուսական վարկը:
