Հայաստանում միլիոնավոր դոլարներ կորցրած ամերիկահայ գործարար Էդմոնդ Խուդյանին պատկանող «Արին կապիտալ» ընկերությունը կանխամտածված սնանկացնելու մասին քրեական գործում առաջիկայում կարող են նոր անուններ ներգրավվել: Նման հավանականություն «Փաստինֆո»-ի հետ զրույցում չի բացառել գործարարի փաստաբան Լեռնիկ Հովհաննիսյանը:
«Մեզ դրա մասին չեն ասել, բայց ինձ թվում է՝ մոտ ժամանակներս կլինի, որովհետև քննության տրամաբանությունը դրան է տանում: Որովհետև ինչքան էլ որ տեղեկացված չենք, բայց լսելով, թե ում են կանչում՝ փոքր տեղ է, ինֆորմացիաներից հասկանում ենք, որ կլինեն նոր մարդիկ»,- մեզ հետ զրույցում նշեց փաստաբանը: Հիշեցնենք՝ Էդմոնդ Խուդյանը բազմիցս հրապարակավ հանդես է եկել հայտարարություններով` պատկան մարմիններին ներկայացնելով կեղծ գործարքներում ներգրավված անձանցից յուրաքանչյուրի` ընկերությանը պատճառած վնասի չափերի ու հանգամանքների մասին փաստեր: Դրանց թվում են նաև «Արին կապիտալ»-ի սնանկության գործով կառավարիչ Հրանտ Ղամբարյանը և ընկերության տնօրեն Էդուարդ Եսայանը, ովքեր մինչ օրս որևէ կարգավիճակով գործում չեն ներգրավվել:
«Կառավարչի հետ կապված ասեմ, որ նրան նախկին քննիչն էլ էր հրավիրել, տեղյակ եմ, որ կառավարչի հետ կապված քննությունը կատարվում է, բայց ի՞նչ շրջանակներում, չգիտեմ»,- ասել է Լեռնիկ Հովհաննիսյանը:
Մանրամասները՝ «Փաստինֆո»-ում:
