Իրանը չի պատրաստվում ռուսական զենիթահրթիռային C-400 «Տրիումֆ» ՀՕՊ համակարգեր ձեռք բերել: Այս մասին հայտարարել է Իրանի ԱԳՆ ներկայացուցիչ Աբաս Մուսավին, հաղորդում է Fars-ը:
Նրա խոսքերով, Թեհրանը C-400 գնման հարցով չի դիմել Ռուսաստանին: Դիվանագետը նշել է, որ իրանական կողմը ներկա պահին այդ համալիրների ձեռքբերման անհրաժեշտություն չի տեսնում: Նա նաև հայտնել է, որ տեղական մասնագետները երկիրը պաշտպանելու համար սեփական համակարգեր են նախագծել:
Մայիսի 30-ին Bloomberg-ը հաղորդել է, որ Մոսկվան հրաժարվել է Թեհրանին C-400 համակարգեր մատակարարել: Մերժելու պատճառը, իբր, եղել է Մերձավոր Արևելքում լարվածության աճի մտավախությունը:
Ռուսական կողմը հերքել է այդ տեղեկությունը: Միևնույն ժամանակ նշվում է, որ Մոսկվան շարունակում է համագործակցել Իրանի հետ նախկինում մատակարարված C-300 համալիրների սպասարկման շրջանակներում:
C-400 «Տրիումֆ»-ը ռուսական միջին և մեծ հեռահարության զենիթահրթիռային ՀՕՊ համակարգեր են: Դրանք նախատեսված են բոլոր տիպի ժամանակակից օդատիեզերական հարձակման միջոցների ոչնչացման համար: