«Առաջին լրատվական»-ի հետ զրույցում մշակույթի գծով նորանշանակ փոխնախարար Արա Խզմալյանը, խոսելով մշակութային քաղաքականության գերագույն նպատակներից, նշեց. «Ներսում՝ հանրային համերաշխության ձևավորումն է, հանրային հակասությունների, մարդու մենակության և լքվածության հաղթահարումն է, իսկ արտաքին առումով մշակույթը դիվանագիտական գործիք է՝ երկրի ճանաչելիության, միջազգային վարկանիշի բարձրացման համար: Մենք կարիք ունենք ավելի հստակ ձևակերպումների, թե ինչ ենք ակնկալում մշակույթից, ինչ հարաբերությունների մեջ պետք է լինի մշակույթը կարգավորող գերատեսչությունը մշակութային հաստատությունների հետ, ով է մշակում մշակութային քաղաքականությունը, ով է իրականացնում, որքանով պետք է գերատեսչությունը մասնակից լինի իրականացման ընթացքին և այլն:
Բազմաթիվ հարցեր կան, որոնց լուծմանն սպասում է այսօր մշակութային հանրությունը, դրանք օրենսդրական, կանոնադրական, կազմակերպչական բնույթի խնդիրներ են… Կան բազմաթիվ տեխնիկական խնդիրներ: Եվ ոլորտի բնույթը հաշվի առնելով՝ պետք է օրենքներն ադապտացնել՝ այդ առանձնահատկություններից ելնելով»:
Ա. Խզմալյանն ընդգծեց, որ խնդիր է դրվել յուրաքանչյուր հարց քննարկել բոլոր շահագրգիռ կողմերի հետ: Նրա դիտարկմամբ՝ այսօր մշակույթը հսկայական սոցիալական բեռ ունի իր վրա. «Պետությունը չի կարող հոգալ բոլոր խնդիրները՝ կապված մշակույթի հետ… Քայլ առ քայլ պետք է գնանք մասնագիտացված մշակութային գործունեության աջակցմանը»:
Անդրադառնալով ՊՈԱԿ-ների գործունեության օրենսդրական կարգավորմանը՝ Ա. Խզմալյանը նշեց. «Մենք մի բան սխալ ենք անում. այս աշխատանքներում ոլորտի ներկայացուցիչներ են ընդգրկվում, բայց շատ քիչ են ներգրավված իրավաբանները. օրենքը մասնագիտական հիմնավորման կարիք ունի»:
«…Երկու-երեք կաթողիկոս ենք փոխել, բայց թատրոնի ղեկավարները դեռ նստած են»,- նկատեց մեր զրուցակիցը:
Մանրամասն՝ տեսանյութում: