Ադրբեջանական Trend լրատվական գործակալության փոխանցմամբ՝ Վրաստանի ներդրումային գործակալությունը հայտարարել է, որ այս տարի իրենք ակնկալում են 1 միլիարդ դոլարի ուղղակի օտար ներդրում։ Այս մասին լրագրողներին հայտարարել է գործակալության ղեկավար Կետի Բոճորիշվիլին։
Վերջինիս խոսքերով՝ Վրաստանը կարողացել է հաջողությամբ հաղթահարել համաշխարհային տնտեսական ճգնաժամը և արդեն նախորդ տարի գրանցել 553 միլիոն դոլարի օտար ներդրումների ցուցանիշ.
«Վրաստանում օտար ներդրումների աճին նպաստում է իշխանությունների վարած ազատական տնտեսական քաղաքականությունը, որը նախորդ տարվա առաջին կիսամյակին արդեն իսկ 6.6 տոկոսանոց աճ է ապահովել։ Այդ քաղաքականության արդյունքում աճել է երկրի վարկանիշային ճանաչվածությունը։
Վրաստանի տնտեսական իմիջի բարելավումը նպաստում է օտար ներդրումների աճին։ Ներկայումս Վրաստանի ներդրումային միջավայրը շատ գրավիչ է, ինչը հաստատում են միջազգային հետազոտությունները։
2011 թվականի առաջին եռամսյակին Վրաստանում ուղղակի օտար ներդրումների ծավալը կազմել է 174 միլիոն դոլար, ինչը 2.3 անգամ ավելին է՝ համեմատած 2010 թվականի միևնույն ժամանակաշրջանի հետ։ Այդ ներդրումների 48 տոկոսը բաժին է ընկել արդյունաբերությանը, 23 տոկոսը՝ ֆինանսական հատվածին, 12 տոկոսը՝ էներգետիկ ոլորտին, 8 տոկոսը՝ շինարարությանը։
Ներդրումների 68 տոկոսը բաժին է ընկել ԵՄ-ի երկրներին»։
