«Առաջին լրատվական»-ը Լեհաստանի արտգործնախարարության և Լեհաստանում Հայաստանի դեսպանության հրավերով գտնվում է Վարշավայում։
Հայաստանը հայտարարել է, որ արտաքին քաղաքականությունում իր վեկտորը չի փոխելու։ Արևելյան գիտությունների կենտրոնում «Առաջին լրատվական»-ի հարցին՝ ինչպե՞ս դա կանդրադառնա Եվրամիության հետ հարաբերությունների վրա, և արդյոք Եվրամիությունում կա՞ այն հասկացությունը, թե ինչպիսի բարդ իրավիճակում է գտնվում Հայաստանը, երբ նախկին իշխանությունների օրոք ռազմավարական և էներգետիկ ռեսուրսները հանձնվել են Ռուսաստանին, ու ինչպես կարելի է թուլացնել այդ ազդեցությունը, Թուրքիայի, Գերմանիայի և Կենտրոնական Ասիայի թիմի ղեկավար Քշիշտոֆ Ստրախոտան պատասխանեց․ «Կարծում եմ՝ Եվրոպան շատ լավ տեղյակ է, թե Հայաստանն ինչպիսի կախվածություն ունի Ռուսաստանից։ Հիշելով Սովետական միությունը, ինչպես նաև դրան նախորդած ժամանակաշրջանը, տեսել ենք այդ տարբեր զարգացումները։ Ինձ թվում է՝ չկան հեշտ ու պարզ ճանապարհներ, որպեսզի կարողանանք փոփոխություններ իրականացնել։ Կարծում եմ՝ Հայաստանը կարճ ժամանակում պետք է հստակեցնի խաղի կանոններն իր գործընկերների հետ»։
Ղարաբաղյան կարգավորման գործընթացի վրա ինչպե՞ս կանդրադառնա Նիկոլ Փաշինյանի կողմից առաջ քաշած՝ Ղարաբաղը բանակցային սեղանի շուրջ վերադարձնելու կարգախոսը «Առաջին լրատվական»-ի հարցին Քշիշտոֆ Ստրախոտան պատասխանեց․ «Վարչապետը հայտնել է իր կարծիքը, և նա ունի այդ կարծիքը հայտնելու ռացիոնալ կարծիքը։ Բայց թե՛ Եվրամիությունը, թե՛ Ադրբեջանը, կարծես թե, չեն կիսում այդ կարծիքը։ Իմ կարծիքով՝ ներկա պահին ես չեմ տեսնում հնարավորություն, որպեսզի ղարաբաղյան կողմը նստի բանակցությունների սեղանի շուրջ»։
Քշիշտոֆ Ստրախոտան նաև հավելեց, որ եթե Արցախը իբրև Հայաստանի մարզ մասնակցի կարգավորմանը, կբերի անեքսիայի։
