Անդրադառնալով օրերս ՀՀ գյուղնախարար Սերգո Կարապետյանի՝ Լոռու մարզի Եղեգնուտ համայնք կատարած այցին՝ թերթը գրում է. «Տվյալ դեպքում խնդիրն այն չէ, որ նման գյուղնախարարն ինքնին արտագաղթի կենդանի խթան է: Ս. Կարապետյանն իրեն այնպես է պահել գյուղացիների հետ շփման ժամանակ, որ նրան գրեթե «դուրս են հրավիրել» գյուղից: Մասնավորապես՝ բնակիչների դժգոհություններին, թե նախարարությունն իրենց ոչնչով չի օգնում, նույնիսկ համապատասխան տեխնիկա չի հատկացնում, Ս. Կարապետյանը բավական կոպիտ է պատասխանել, ինչն ավելի է ըմբոստացրել գյուղացիներին:
Այդ հանդիպման ականատեսների վկայությամբ՝ գյուղացիների դժգոհությունները մեղմելու փոխարեն՝ Ա. Կարապետյանը նկատողություն է արել նրանց՝ ասելով. «Կարտ ու նարդի եք խաղում, ինչո՞ւ չեք գնում հանդ»: Նրա այս խոսքերն ավելի են զայրացրել գյուղացիներին, որոնցից մեկը, ի պատասխան Կարապետյանի, ասել է. «Տո ջահել, մեր գյուղում ձենդ չբարձրացնես»: Զգալով, որ գյուղացիների մոտ «վերակացուի» իր պահվածքը հակառակ արդյունքի է հանգեցնում, Կարապետյանը սկսել է արդարանալ՝ ասելով. «Ես էլ մարդ եմ, ես էլ եմ բորբոքվում»,- գրում է թերթը և հավելում.
«Չնայած, Կարապետյանին կարելի է հասկանալ. մարդը, գյուղատնտեսության նախարար դառնալով, հույս ուներ, որ դաշտերն օրհնելով ամեն ինչ լավ կլինի, իրեն էլ գյուղացիները «մինիստրի տեղ կդնեն», սակայն կյանքը ցույց տվեց, որ իր պաշտոնավարման յուրաքանչյուր օրը ավելի ծանր է դարձնում գյուղատնտեսության ու գյուղացու վիճակը: Եվ ստացվում է, որ կա՛մ Ս. Կարապետյանը (դիցուք) պետք է արտագաղթի, կա՛մ գյուղացիները: Ովքեր արդեն արտագաղթում են ոչ թե անհատապես կամ ընտանիքներով, այլ՝ ամբողջական գյուղերով»: