Ալ.Սպենդիարյանի անվան Օպերայի և բալետի ակադեմիական թատրոնում խռովությունները շարունակվում են: Պատճառը կոլեգիալ կառավարման մարմնի խորհրդի մայիսի 22-ի որոշումն է, ըստ որի՝ Օպերային թատրոնի կառավարման խորհրդի նախագահ է ընտրվել մշակույթի նախարարի նախկին պաշտոնակատար Նազենի Ղարիբյանը:
Տիկին Ղարիբյանը, փաստացի, ընտրվել է Օպերային թատրոնի կառավարման խորհրդի նախագահ: Թատրոնի աշխատակիցները ակնհայտորեն գոհ չեն, կարող եմ ասել՝ դժգոհ են, թատրոնի անձնակազմը, թերևս, դեմ է. ինչո՞ւ: «Առաջին լրատվական»-ի այս հարցին ի պատասխան՝ Օպերային թատրոնի դիրիժոր Հարություն Աբրահամյանը մասնավորապես ասաց. «Ինձ համար էլ է անհասկանալի. ո՞րն է նպատակը: Դա որպես ապագա աշխատանք ես չեմ պատկերացնում: Մի կոլեկտիվի հետ, որն 99 տոկոսով իրեն չի ընդունում: Օպերային թատրոնը Հայաստանի ամենամեծ ՊՈԱԿ-ն է, որի դեմ արդեն ամիսներ շարունակ գործունեություն է ծավալել Ղարիբյանը, և որի ոչ մի փորձի ու ներկայացման ներկա չի եղել. ինչպե՞ս պետք է աշխատի նրա հետ: Աբսուրդն այն է, որ նիստերը սովորաբար տեղի էին ունենում Օպերային թատրոնում, հանկարծ,- դե, հասկանում է, որ չի կարող մեզ հետ աշխատել,- կառավարման խորհրդի այդ նիստերը տեղափոխել է նախարարություն և, ձեզ գաղտնիք բացեմ, լուրեր է տարածում, որ ինքը լինելու է նաև ապագա կառավարությունում, և կարծես թե ավտոմատ հասկացրել է, որ իրեն ընտրեն:
Հաջորդ աբսուրդն այն է, որ կառավարման խորհրդի կեսը նախարարության ներկայացուցիչներն են. ութ հոգուց չորսը նախարարությունից են, մեկը Կոմպոզիտորների միության նախագահ Սաթյանն է, որն այդ օրը հիվանդ է եղել, ներկա չի եղել, մեկը երգչախմբային ընկերության նախագահ Դավիթ Ղազարյանն է, և երկու հոգի միայն Օպերայից են, որոնց ձայնը, իհարկե, ոչինչ չի որոշում, և սա, իհարկե, անհասկանալի է: Այստեղ անհասկանալի չափաբաժիններով է, և սա, իհարկե, սխալ է»:
«Ընդհանրապես, շատ կարևոր է կառավարման խորհուրդը, որովհետև, ըստ կանոնադրության, տնօրենը կառավարման խորհրդի հետ իրականացնում է Օպերային թատրոնի ղեկավարումը: Սա ուղղակի ձևական ֆունկցիա չէ, սա պիտի կատարի Օպերային թատրոնի խնդիրները լուծողի դեր, այդ խնդիրները կառավարության առջև բարձրացնողի, աջակցողի դեր… Տիկին Ղարիբյանի նպատակը, երևի, բոլոր մշակութային ՊՈԱԿ-ները օպտիմալացնելն է, մենք, բնականաբար, ոչ մի աջակցություն չենք էլ ակնկալում»,- նշեց նա:
Ըստ Օպերյին թատրոնի դիրիժորի՝ Նազենի Ղարիբյանի՝ այդ պաշտոնում լինելու իմաստը անհասկանալի է: Նա ասում է՝ ոչ մեկը իրավունք չունի պահանջ ներկայացնելու, որ հրաժարական տամ, իրավունք չունեն պահանջեն, որ գամ: «Երևի, ինքն էլ հասկանում է իր գործունեության ապակառուցողական լինելը, բայց… Չգիտեմ… Նրա ոչ մի խոսքը մյուսին չի բռնում»,- հավելեց նա:
Մանրամասները՝ տեսանյութում։