Մայիսի 28-ին հայկական մեդիայում տարածվեց Սերժ Սարգսյանի ուղերձը Առաջին հանրապետության օրվա կապակցությամբ, որն ինչպես պարզվեց՝ հետագայում, մի քանի ժամ անց, կեղծ էր: Սերժ Սարգսյանը մայիսի 28-ին ՀՀԿ-ականների հետ այցելել էր Սպիտակավոր եկեղեցի՝ Նժդեհի գերեզմանին, անգամ երգել՝ քաջ Նժդեհի սուրը շողշողա, սակայն ուղերձ չէր հղել: Բայց, դրանով հանդերձ հարկ է նկատել մի ուշագրավ հանգամանք՝ Սերժ Սարգսյանն ու ՀՀԿ թիմն առանձնապես մեծ դժգոհություն չարտահայտեցին համացանցում, հետո նաև ինքնաբերաբար մամուլում նրա անունից տարածված կեղծ ուղերձի կապակցությամբ:
Ինչ խոսք, այնպես չէ, որ ուղերձը կրում էր մի բովանդակություն, որի համար Սարգսյանը պետք է անհարմար զգար: Բայց, բոլոր դեպքերում, Սերժ Սարգսյանի և ՀՀԿ վերաբերմունքն այդ ուղերձին բավականին զուսպ էր, ընդ որում այնքան, որ թողնում էր նույնիսկ ուղերձից գոհ լինելու տպավորություն: Իսկ դրա տարածումն իսկապես ուշագրավ էր, որովհետև տեղի ունեցածը կատարվել էր բավականին նուրբ նշանային տողատակով, զուտ պատահական զվարճանք կամ ապատեղեկատվություն լինելու համար: Խոսքն այն մասին է, որ ընտրված էր Սերժ Սարգսյանի 2016 թվականի մայիսի 28-ի առիթով նախագահական ուղերձի վերջին պարբերությունը, որտեղ նա խոսում է անդունդի եզրից հետ գալու, աշխատանքի և վերադառնալու մասին: Այդ բովանդակությունը «պատիվ կբերեր» ցանկացած գործչի, մինչդեռ Սերժ Սարգսյանի դեպքում կհարուցեր հանրության որոշակի իրարանցում և վրդովմունք՝ ինչպես թե, նա դեռ խոսում է վերադառնալու մասին: Ըստ այդմ հարց է առաջանում, թե ու՞մ կարող էր ձեռնտու լինել Սարգսյանի «վերադարձի» մասին նրբորեն և իրապես քաղաքական տեխնոլոգիայի բավականին ճաշակով և բարձր քիմքով ընտրված ֆեյք-նյուզի տարածումը:
Հատկանշական է, որ դա տեղի ունեցավ այն տեղեկատվությունից հետո, որ երկրորդ նախագահ Ռոբերտ Քոչարյանի գրասենյակն էր տարածել Սարգսյան-Քոչարյան հանդիպման մասին, իհարկե նշելով, որ դա եղել է Սերժ Սարգսյանի զուտ անձնական այց Ռոբերտ Քոչարյանին՝ կես տարի անազատությունից հետո նրա ազատվելու կապակցությամբ, առանց քաղաքական հարցերի քննարկումից:
Երբ Սերժ Սարգսյանի «վերադարձի» ուղերձը համադրում ենք այդ տեղեկատվության հետ, ապա կարող է ստացվել հետաքրքիր պատկեր: Բանն այն է, որ Սերժ Սարգսյանն արդեն մի քանի շաբաթ մի կողմից գեներացնում է իր՝ ուր որ է խոսելու մասին սպասումներ, մյուս կողմից էլ պարբերաբար ասում, որ կխոսի, երբ գա ժամանակը: Ի՞նչ են խոսել նաև Ռոբերտ Քոչարյանը, որ դրանից հետո ինչ-որ մեկը տեսել է Սարգսյանի անունից «վերադարձի ուղերձ» «բեմադրելու» անհրաժեշտություն: Դրա նպատակը Սարգսյան-Քոչարյան համաձայնություն իմիտացնելն է՞ր: Իսկ դա կարո՞ղ էր նշանակել, որ համաձայնություն չի եղել, թե՞ հակառակը՝ Սարգսյանի «վերադարձը» Ռոբերտ Քոչարյանի համար աջակցություն կամ ուժ չէ, այլ հակառակը, մի շարք պատճառների և հանգամանքների բերումով:
