Վրաստանի խորհրդարանի նախկին խոսնակ, «Ժողովրդավարական շարժում-Միասնական Վրաստան» ընդդիմադիր կուսակցության առաջնորդ Նինո Բուրջանաձեն հայտարարել է, որ Վրաստանում իշխանափոխության միակ ճանապարհը ժողովրդական հուզումներն են: «Եթե նոյեմբերի 25-ին խորհրդարանի շենքի առջեւ հավաքվի 200 հազար մարդ, ապա այդ ժամանակ իշխանությունները ստիպված կլինեն երկխոսության գնալ Ժողովրդական ներկայացուցչական ժողովի հետ, որն օրինական մարմին է»,- ասել Է Բուրջանաձեն «Կվիրիս պալիտրա» շաբաթաթերթին տված հարցազրույցում: Նոյեմբերի 25-ին Ժողովը Վրաստանի խորհրդարանի շենքի առջեւ հանդիպում է անցկացնելու երկրի տարբեր տարածաշրջանների պատվիրակների հետ: Դրան պաշտոնապես կմասնակցի 12,5 հազար մարդ: Բուրջանաձեն նշել է, որ ընտրությունների ճանապարհով Վրաստանում իշխանափոխությունն անհնարին Է: Ըստ նրա՝ անհրաժեշտ է ժողովրդի միավորումը, որը պետք է դրսեւորվի նոյեմբերի 25-ի ակցիայի ընթացքում: «Մենք ժողովրդին չենք խաբում ու չենք ասում, որ նոյեմբերի 25-ին կսկսվի շարժում, իսկ 26-ին մենք կլինենք իշխանության գլուխ, դա իշխանափոխության գործընթացի սկիզբն է, եւ մենք խոստանում ենք, որ ժողովրդի աջակցությամբ այն կհասցնենք ավարտի»,- նշել է խորհրդարանի նախկին խոսնակը: Բուրջանաձեն ընդգծել է, որ եթե այժմ չհաջողվի հասնել փոփոխությունների, «նրանք իշխանության գլուխ կմնան եւս 30-40 տարի», փոխանցում է Грузия Online-ը: