Ալեքսանդր Սպենդիրյանի անվան ազգային ակադեմիական թատրոնի գեղարվեստական ղեկավար, դիրիժոր Կոնստանտին Օրբելյանը դատական հայց է ներկայացրել ընդդեմ ՀՀ վարչապետ Նիկոլ Փաշինյանի և մշակույթի նախարարի պարտականությունները կատարող Նազենի Ղարիբյանի։ Օրբելյանը պահանջում է իր լիազորությունները դադարեցնելու հրամանն անվավեր ճանաչել:
Թեմայի շուրջ «Առաջին լրատվական»-ի հետ զրույցում դիրիժոր Կարեն Դուրգարյանը նշեց, որ մի կողմից՝ Կ. Օրբելյանը, որպես քաղաքացի, ունի իր իրավունքները և դատի է տվել, մյուս կողմից՝ պետական համակարգն իր տեսակետն ունի: «Շատ քաղաքացիներ տեղյակ չեն օրենսգրքից, ապրում ենք առանց օրենք իմանալու, եթե օրենքը լավ իմանայինք, այն ինչ-որ այսօր է կատարվում Հայաստան աշխարհում, չէր լինի, այս օրին չէինք հասնի»,- նշեց Կ. Դուրգարյանը՝ հավելելով, որ չի կարծում, թե այս պրոցեսը ցեխ կնետի Հայաստանի օպերային թատրոնի իմիջի վրա:
Մեծ փոփոխությունների շեմին ենք, և ամեն օր նորանոր զարգացումներ են տեղի ունենում և նոր խնդիրներ են ծառանում մեր առջև: Անդրադառնալով այս դիտարկմանը և հարցին, թե ինչպիսին է Հայաստանը հեղափոխությունից մեկ տարի անց, դիրիժորը նշեց. «Ես քիչ եմ լինում Հայաստանում, բայց մարդկանց հայացքներից իմ տպավորությունն այն է, որ մարդիկ ինչ-որ մի բանի հավատում են, ամենավտանգավորը այդ հավատը կոտրելն է: Դեռևս 15 տարի առաջ էի ասում, որ հեղափոխությունն անելու են երիտասարդները. խոսքս միայն տարիքով երիտասարդների մասին չէ… Պետք չէ վախենալ երիտասարդներից, պետք է հնարավորություն տալ այս փուլն անցնել… Ծանր տարիները հաշվի առնելով՝ մենք պետք է հասկանանք՝ ուր ենք գնում այսօր, վստահ եմ՝ երիտասարդությունը հավատքով է գնում առաջ, փոփոխություններ, միանշանակ, պետք են. երիտասարդներն ուզում են ապրել լավ: Պետք է նրանց աջակցել, բայց երիտասարդն էլ ժամանակ առ ժամանակ իր մեջ պետք է ուժ գտնի, տարիքով մարդկանցից խորհուրդ հարցնի՝ ինչպես վարվել»:
Մանրամասն՝ տեսանյութում:
