ՀՀ կառավարությունը, ի դեմս Նիկոլ Փաշինյանի, հայտարարեց հեղափոխության ամենակարևոր՝ դատաիրավական համակարգի բարեփոխման փուլի մասին: Դատաիրավական համակարգի զոհերն են եղել նաև գերակա շահի անվան տակ սեփականությունից զրկված մի շարք քաղաքացիներ: 2006թ. ՀՀ-ում ընդունվեց հասարակության և պետական կարիքների համար սեփականության օտարման մասին օրենքը, որը, ինչպես ՀՀ օրենքների մի մասը, միտված էր ծառայելու որոշ մարդկանց նեղ շահերին: Թեմայի շուրջ «Առաջին լրատվական»-ի հետ քննարկմանը մասնակցեցին «Պետական կարիքների զոհեր» ՀԿ նախագահ Սեդրակ Բաղդասարյանը, Բուզանդ փողոցի նախկին բնակիչ Տատյանա Զարիկյանցը և Հյուսիսային պողոտայի նախկին բնակիչ Աստղիկ Միքայելյանը, ովքեր դեմ առ դեմ առնչվել են այս համակարգի հետ:
«Այդ օրենքն ընդունվեց հանցագործությանը օրինական կարգավիճակ տալու համար, որպեսզի քաղաքացիները հնարավորություն չունենան դիմել ՄԻԵԴ,- ընդգծեց Ս. Բաղդասարյանը: -Կառավարության որոշումը վավերացրեց մի անձ, որը, 1998թ. ոտնահարելով Սահմանադրությունը, դարձել էր նախագահ: Եվ նրան թվում էր, որ անընդհատ կարելի է ոտնահարել ՀՀ Սահմանադրությունը: Հետագա քայլերը ցույց տվեցին, որ կառավարության բոլոր որոշումները, որ նա վավերացրել է, եղել են հակասահմանադրական»:
«Հայրիկիս տանից վտարման նպատակով ծեծի են ենթարկել, այդ ընթացքում իմ գլխին էլ են հարվածել,- հիշում է Աստղիկ Միքայելյանը,- հայրիկիս տարել էին ոստիկանության բաժին, վարչական իրավախախտման վերաբերյալ գիշերով դատ են անցկացրել և երեք օրվա կալանք տվել, հրաման կար, որ երեք օրվա ընթացքում տունը դատարկվեր և քանդվեր՝ մի քար չպետք է մնար այնտեղ»:
Ս. Բաղդասարյանի խոսքով՝ խայտառակ որոշումներ էին կայացվում, և խոսքը ոչ թե գույքի ցածր գնահատման մասին է, այլ այն մասին, որ պետական մարմինը խաբեությամբ ռեկետ է անում՝ ի դեմս ծրագրերի իրականացման գրասենյակի:
«Ինձ համար անհասկանալի է. ինչո՞ւ ես ամեն ինչ ունենալով՝ պետք է ունեցվածքից զրկվեի, իսկ ով որ տրեխներով եկավ Երևան հասավ, ամեն ինչի տեր պիտի դառնա…,- նշեց Տ. Զարիկյանցը:- Դիմեցինք դատարան, դատավորն ասաց՝ ուզում ես քո օգտին որոշում կայացնեմ, որ կանչեն Քոչարյանի կզարա՞ն՝ Բաղրամյան 26… Քոչարյանը իր փտած կաշին փրկելու համար ազգին մատաղ է անում»:
Մանրամասն՝ տեսանյութում:
