«Ռուսաստանի ծրագիրն է Թուրքիայի և Ադրբեջանի միջոցով որոշակի ժամանակահատվածում, բնականաբար զոհելով Հայաստանը, դուրս գալ Միջին Ասիայի թուրքալեզու երկրների վրա և ճնշում բանեցնել Չինաստանի վրա, որպեսզի Չինաստանը ըստ էության կործանվող Ռուսաստանին տեր կանգնի»,- «Առաջին լրատվական»-ի հետ զրույցում այսպիսի կարծիք հայտնեց Առաջատար տեխնոլոգիաների ձեռնարկությունների միության գործադիր տնօրեն Կարեն Վարդանյանը՝ անդրադառնալով Հայաստանը շրջապատող աշխարհաքաղաքական իրավիճակին:
Նրա խոսքով՝ նույն Ռուսաստանն ունի իր ազդեցության գործակալները, որոնք եղել են ՀՀ երեք նախագահները և Արցախի առնվազն վերջին երկու նախագահները. «Դա ակնհայտ է, որովհետև Արցախի վերջին նախագահը փորձեց անջրպետ գցել ՀԽՍՀ տարածքում գտնվող Հայաստանի հետ. դա ցույց տվեցին նաև նրանց կոչերը՝ կապված Ռուսաստանի հետ»:
Կարեն Վարդանյանի խոսքով՝ մյուս պրոցեսն այն է, որ ազդեցության գործակալներին ազատ արձակեն և չթողնեն, որ նրանց ինչ-որ մեկը նեղացնի. «Որովհետև նրանց վրա շատ ջանք է թափվել: Եվ ես համոզված եմ, որ Ռուսաստանը շատ մեծ ճնշում է բանեցրել ՀՀ իշխանությունների վրա, և հետո ազդեցության մյուս գործակալները Արցախից եկան և շղարշ ստեղծեցին Ռոբերտ Քոչարյանի խափանման միջոցը փոխելու: Այսինքն՝ սա ուղիղ կապված է գեոքաղաքականության հետ»:
ԱՏՁՄ տնօրենը վարչապետ Փաշինյանին խորհուրդ կտար հինգին էլ անմիջապես ձերբակալել. «Եվ սկսել տրիբունալ, որովհետև նրանք միաժամանակ եղել են նաև գլխավոր հրամանատար, և դատել պետական դավաճանության համար, որի ապացուցողական բազան պետք չէ ման գալ. ամբողջ օրենքները դրված են ինտերնետում, տակերն էլ իրենց ստորագրություններն են: Դրա արդյունքում ժողովուրդը կմիաբանվեր, մենք կմաքրվեինք այդ մարդկանցից, որոնք 30 տարի խանգարել են, որ մենք դառնանք արժանապատիվ վերամիավորված երկիր, և նաև՝ կբացվեր ճանապարհ մեր զարգացման համար»:
Մեր զրուցակցի խոսքով՝ Հայաստանում և Սփյուռքում ռուսամետ ուժերն աշխատում են Թուրքիայի և Ադրբեջանի շահերի ուղղությամբ. «Փաշինյանը, նպատակահարմար չհամարելով փակագծերը բացել, ըստ էության նկարագրել է նույն գործընթացը»:
Հարցազրույցն ամբողջությամբ՝ տեսանյութում: