«Առաջին լրատվական»-ի զրուցակիցն է քաղաքական վերլուծաբան, Detector.am կայքի գլխավոր խմբագիր Էդգար Վարդանյանը։
-Պարոն Վարդանյան, օրերս բավականին սուր շեշտադրումներով հանրահավաք անցկացրեց Դաշնակցությունը։ Հետաքրքիր է նման տրամադրություններն ի՞նչ ազդեցություն կարող են ունենալ՝ հատկապես այն ֆոնին, երբ վերջին հարցման համաձայն վարչապետի վարկանիշը 10 տոկոս անկում է գրանցել։
–Վարկանիշի հետ կապված անհրաժեշտ է նշել հետևյալը. ցավոք սրտի, Հայաստանում չեն իրականացվում այնպիսի հարցումներ, որոնց նկատմամբ վստահելիության մակարդակը բարձր կլիներ, ուստի մենք այսօր չենք կարող իմանալ, թե իրականում վարկանիշի տատանում կա, թե ոչ։ Մենք այսպես թե այնպես առաջնորդվում ենք վերջին ընտրությունների արդյունքներով։
Պետք է նշենք նաև, որ թեև Նիկոլ Փաշինյանը և իր թիմը արդարացիորեն դիտարկվում են որպես ժողովրդավարական հեղափոխության առաջնորդներ, բայց կարծում եմ, որ ճիշտ չէ նույնականացնել ժողովրդավարական հեղափոխությանը մասնակցած հանրությանը և Նիկոլ Փաշինյանին ու իր թիմին։ Ժողովրդավարական հեղափոխությանը մասնակցած հանրությունը շատ ավելի մեծ ընդգրկում ունի, քան Նիկոլ Փաշինյանի թիմը։Այսինքն՝ ժողովրդավարական հեղափոխությանը մասնակցած ժողովրդավարական հանրությունը ներկայացված է տարբեր խմբերով, իհարկե հասկանալի է , որ Նիկոլ Փաշինյանի թիմը ամենամեծ խումբն է։ Եվ հետագայում հնարավոր է, որ Նիկոլ Փաշինյանի վարկանիշը նվազի, բայց դա պարտադիր չի նշանակելու, որ նվազում է հեղափոխական հանրության վարկանիշը, որովհետև կարող է Նիկոլ Փաշինյանի վարկանիշը նվազի, բայց մեկ այլ հեղափոխությանը մասնակցած և ժողովրդավարական արժեքները կարևորող ժողովրդավարության ջատագով մեկ այլ ուժի կամ անհատների վարկանիշ բարձրանա։ Այդ պարագայում նախկին ռեժիմի ջատագովների մերժվածության մակարդակը չի փոխվի, այսինքն նրանք կշարունակեն մերժված լինել հանրության բացարաձակ մեծամասնության կողմից՝ անկախ այն հանգամանքից, թե Փաշինյանի վարկանիշը բարձրանու՞մ է, մնում է նույնը՞, թե՞ նվազում։ Եթե մենք խոսում ենք նախկին ռեժիմի ներկայացուցիչների մասին և երբ մենք ասում ենք՝ արդյոք նրանք կկարողանան բացասաբար ազդել հեղափոխության ձեռքբերումների վրա կամ արդյոք կկարողանան հակահեղափոխություն անել կամ այնպես անեն, որ վնասեն ներկայիս ժողովրդավարական փոփոխություններին՝ կարծում եմ, որ նրանց այդպես անելու շանսերը նվազագույնն են։Նրանք մերժված են… Հայաստանում կան բազմաթիվ խնդիրներ, իշխանությունները ժամանակ առ ժամանակ որոշակի սխալներ է թույլ տալիս, բայց դրանք չեն կարող հանգեցնել հակահեղափոխական ուժերի ուժեղացմանը։ Դրանք կարող են հանգեցնել Փաշինյանի ու իր թիմի վարկշանիշի նվազմանը, բայց ոչ հակահեղափոխական ուժերի վարկանիշի բարձրացմանը կամ հզորացմանը։
-Այսինքն եթե նույնիսկ Փաշինյանի վարկանիշն անկում ապրի, դա ամենևին չի նշանակում, որ հանրությունը հնի վերադարձ է ուզում։
-Այո՛։ Հանրությունն ամեն դեպքում հստակ կողմնորոշված է եղել նախկին ռեժիմի դեմ։Հանրությունը ավելի շատ ընդդեմ նախկին իշխանությունների է եղել, քան կողմ ինչ-որ մեկի։ Պարզապես Փաշինյանն ու իր թիմը կարողացան իրենց լավագույնս դրսևորել նախկին ռեժիմի դեմ մղվող պայքարում ու ձեռք բերեցին լուրջ հեղինակություն։Նրանք կարողացան համաժողովրդական ընդվզումը գրագետ ձևով կազմակերպել ու այնպես անել, որ այդ ընդվզումը հաջողության հասնի։ Հիմա մարդիկ եթե ինչ-որ բաներից դժգոհում են, ինչ-որ հարցերից հիասթափվում՝ դա ամենևին չի նշանակում, որ իրենք հանկարծ պետք է նախկին ռեժիմին պաշտպանեն։Այսինքն նախկին ռեժիմը որևէ շանս չունի ժողովրդի միջոցով որևէ հաջողություն գրանցել։ Միակ տարբերակը քաղաքական դաշտում մնալու կամ ինչ-որ հաջողության հասնելու համար՝ հակասահմանադրական, բռնի գործունեությունն է, որտեղ ներգրավված կլինեն սահմանափակ թվով մարդիկ։
-Երբ ՀՅԴ-ն խոսում է այն մասին, որ հաջորդը կարմիր քարտ է լինելու, նման վտանգներ կարո՞ղ ենք սպասել, դա՞ է կարմիր քարտը։
–Դա քարոզչական հնարք է, որը որևէ ազդեցություն հանրային տրամադրությունների վրա չի կարող ունենալ։Հիմա կոնկրետ Դաշնակցությունն է այդ ամենը կազմակերպել բայց հանրային ընկալումներում Դաշնակցությունը, հատկապես երբ այդպիսի կոշտ հակաշխանական կեցվածք է ընդունել՝ ասոցացվում է նախկին ռեժիմի հետ։Մարդիկ՝ ի դեմս Դաշնակցության հասկանում են, որ սա նախկին ռեժիմի, հակահեղափոխական թևերից մեկն է։Մարդիկ նրանց որևէ հայտարարություն ուշադրությանն արժանի չեն համարում։ Բոլոր տեսակի հակահեղափոխական քայլերը, որոնք արվում են նախկին քաղաքական ռեժիմի այս կամ այն շրջանակների կողմից՝ դրանք պարզապես հալածվողի կերպար ստեղծելու համար են, որպեսզի քողարկեն նաև հնարավոր հակասահմանադրական քայլերը, որոնք միգուցե որոշ մարդկանց մտքերում կան։ Ես չգիտեմ, թե որքանով են արժանահավատ այն տեղեկությունները, որ իրականում նախկին քաղաքական ռեժիմի ներկայացուցիչները ցանկանում են ռևանշի հասնել, չի բացառվում, որ նման նպատակ էլ չկա։ Հնարավոր է, որ բոլոր այդ գործողությունները պարզապես հալածյալի կերպար ստեղծելու համար է։ Իսկ ինչի՞ համար է այդ կերպարը, միայն այն բանի համար, որ նրանց հանգիստ թողնեն կամ երբ իրավապահ մարմինները նրան դիպչեն, կարողանան ինքնապաշտպանվել այդ կեղծ հալածյալի կերպարն առաջ քաշելով։Այսինքն կարող է երկու սցենար լինել, դժվար է ասել, թե որ սցենարն է ավելի ծանրակշիռ։
