ԲԴԽ նախագահ Գագիկ Հարությունյանի և նրա եղբայր, ԱԱԾ փոխտնօրեն Արզուման Հարությունյանի հրաժարականները կապ ունեն վերջին օրերին Հայաստանում տեղի ունեցող զարգացումների հետ, երբ Նիկոլ Փաշինյանը հայտարարեց դատական համակարգում վիրահատական միջամտության անհրաժեշտության մասին։ Այս մասին «Առաջին լրատվական»-ի հետ զրույցում նշեց ՌԱՀՀԿ տնօրեն, քաղաքագետ Մանվել Սարգսյանը՝ հավելելով, որ դա փոխել է երկրում հոգեբանական վիճակը։
«Կարելի է սպասել ինչ-որ հրաժարականներ, դատական մի ճյուղը մյուսի դեմ հայտարարություններ և այլն։ Հիմա ականատես ենք հետաքրքիր, կարևոր ու շատ սպասված պրոցեսի հետ, որովհետև մեկ տարի է բոլորը խոսում են, մենք էլ ենք խոսել, որ պետք է հռչակած կարևորագույն կետերը, որոնք պետք է կանոնավորեն հռչակած նոր Հայաստանը, արվեն։ Եթե չես անում, ստեղծվում է մի վիճակ, երբ ճգնաժամային վիճակում ստիպված ես գնում նման կարևոր քայլերի։ Մինչ այդ եղան հակասություններ կառավարության և խոշոր բիզնեսների միջև, կոլեկտիվները դուրս եկան փողոց։ Դա նույնպես տեղի ունեցավ այն պատճառով, որ կանոնավորված չի տնտեսական դաշտը»,-ընդգծեց Մանվել Սարգսյանը։
Նրա խոսքով, փաստորեն պետք է «Մարտի 1»-ի դատավարության մեջ ճգնաժամ առաջանար, որ նոր կյանքը ստիպեր ռեալ քայլ անել։ «Շատ քիչ երկրներում է նման բան լինում։ Սա ոչ թե դատական համակարգի ռեֆորմ է, այլ այդ համակարգի ստեղծում, որովհետև մինչ այս գոյություն չի ունեցել երբևէ դատական համակարգ։ Մենք ունեցել ենք քաղաքական իշխանությունների շարունակություն հանդիսացող կլանային ինչ-որ համակարգ, որը տասնամյակներ գործել է հանրությանն ստրկացնելու համար»,-ընդգծեց քաղաքագետը։