«Արսենալի» հայ կիսապաշտպան Հենրիխ Մխիթարյանը շարունակում է մնալ միջազգային մամուլի ուշադրության կենտրոնում: Բրիտանական պարբերականները վերջին օրերին արդեն ծավալուն հոդվածներ են հրապարակում հայ-ադրբեջանական հակամարտության վերաբերյալ, անդրադառնում Արցախի խնդրին, խոսում տեղի ունեցած պատերազմի մասին: Շնորհիվ Մխիթարյանի միլիոնավոր մարդիկ իրազեկվեցին Ադրբեջանի վարած քաղաքականության մասին, որի պատճառով Եվրոպա լիգայի խաղարկության եզրափակիչը ուղակի հեղինակազրկվեց: Բաքու չմեկնելու խնդրից զատ բրիտանական ԶԼՄ-ները վերջին օրերին անդրադառնում են մեկ այլ հարցի, որն ըստ պնդումների դարձել է օրակարգային: Մասնավորապես, նշվում է, որ Հենրիխ Մխիթարյանը պաշտոնական հանդիպումներում հնարավոր է այլևս չկրի «Արսենալի» մարզաշապիկը՝ ամռանը տեղափոխվելով մեկ այլ թիմ:
Մասնավորապես, հեղինակավոր The Sun պարբերականը գրում է, որ Եվրոպա լիգայի խաղարկության եզրափակչին չմասնակցելու հարցում ակումբն իր լիակատար աջակցությունը ցույց տվեց հայ ֆուտբոլիստին, բայց…: Այնուամենայնիվ «Արսենալի» ղեկավարությունը դեմ չեն լինի, եթե Հայաստանի հավաքականի ավագը որոշի ամռանը լքել թիմը: Նույն խնդիրի առաջ է կանգնած նաև մեկ այլ կիսապաշտպան Մեսութ Օզիլը: Ըստ պարբերականի լոնդոնյան թիմում նրա հետ ևս հեռակա ծրագրեր չունեն: Օզիլի պայմանագիրն ավարտվում է 2021 թվականին: Գերմանիայի հավաքականի նախկին ֆուտբոլիստը, վերջերս հայտարարել էր որ մտադիր չէ լքել «Արսենալը»: Ավելի վաղ Football London պարբերականը կազմել էր այն ֆուտբոլիստների ցանկը, որոնք կարող են ամառային տրանսֆերային պատուհանի ընթացքում լքել լոնդոնյան ակումբը: Նրանց թվում է նաև Հենրիխ Մխիթարյանը: Ըստ պարբերականի՝ Մխիթարյանը տաղանդն ի ցույց դրել է մրցաշրջանի սկզբում, սակայն կայուն խաղ չի ցուցադրում: ««Արսենալը» կմտածի Մխիթարյանից բաժանվելու մասին, եթե լուրջ առաջարկ ստանա:
Հայ կիսապաշտպանը երկրորդ ամենաբարձր վարձատրվող ֆուտբոլիստն է «զինագործների» կազմում»,- գրել էր բրիտանական պարբերականը: Նշվում է նաև, որ «Արսենալի» գլխավոր մարզիչ Ունայի Էմերին կարող է հրաժարվել Մխիթարյանի և Օզիլի ծառայություններից, քանի որ ֆուտբոլիստները ամենաբարձրն են վարձատրվում լոնդոնյան կազմում, իսկ Էմերին ցանկանում է այդ գումարն առավել նպատակային օգտագործել: Մխիթարյանը «Արսենալում» շաբաթական ստանում է 180 հազար, իսկ Օզիլը՝ 350 հազար ֆունտ: Իսպանացի մասնագետի կարծիքով՝ այդ գումարներով «Արսենալը» կարող է ամրապնդել պաշտպանության ու հարձակման գոտիները: Տրանսֆերային պատուհանի ընթացքում ֆուտբոլիստներից հրաժարվելու վերաբերյալ լոնդոնյան ակումբը դեռևս որևէ հայտարարություն չի արել: Միակ խաղացողը, որը ամռանը լքելու է «Արսենալը», Ուելսի հավաքականի կիսապաշտպան Աարոն Ռեմսին է: Վերջինս ձմեռային տրանսֆերային պատուհանի ընթացքում պայմանագիր էր կնքել Իտալիայի չեմպիոն Թուրինի «Յուվենտուսի» հետ: Ինչևէ, Անգլիայի Պրեմիեր լիգայում Լոնդոնի «Արսենալը» բավարարվեց 5-րդ հորիզոնականով՝ չնայած իրական հնարավորություն ուներ բրոնզե մեդալը նվաճելու: Գալիք մրցաշրջանում Չեմպիոնների լիգայում հանդես գալու «Արսենալի» հույսը Բաքվում կայանալիք եզրափակիչն է: Հենրիխ Մխիթարյանն արդեն երրորդ մրցաշրջանն անցկացրեց Պրեմիեր լիգայում:
25 խաղում Մխիթարյանը դարձավ 6 գոլի և 4 գոլային փոխանցման հեղինակ: 2017/2018թթ. մրցաշրջանում մեր կիսապաշտպանը 26 խաղում դարձել էր 3 գոլի և 9 գոլային փոխանցման հեղինակ: Գոլ գումարած փոխանցում հաշվարկով 2017/2018 թթ. մրցաշրջանում Մխիթարյանը ստացել էր 12, իսկ ավարտված մրցաշրջանում՝ 10 միավոր: Ընդհանուր առմամբ կարող ենք ասել, որ վերջին երկու մրցաշրջանում Մխիթարյանն «Արսենալում» ցուցադրել է կայուն խաղ: Հետևաբար բրիտանական լրատվամիջոցների պնդումները մեր ֆուտբոլիստի հեռանալու մասին չի կարելի որակել որպես իրականություն: Մասնավորապես, լուրջ չէ այն պնդումը, որ Էմերին ցանկանում է ազատվել Մխիթարյանից և Օզիլից:
Առջևում Բաքվի եզրափակիչն է և անհաջողության մատնվելու դեպքում կարծում ենք օրակարգում կլինի հենց Էմերիի պաշտոնանկության հարցը:
