Այսօր խորհրդարանում մեկնարկեցին լսումներ անցումային արդարադատության թեմայով: Միաժամանակ վեթինգը (զտման գործընթաց) գործնականում իրականություն է դառնում՝ չսպասելով օրենսդրական ու հայեցակարգային կարգավորումների. այսօր հրաժարականի դիմում էր ներկայացրել ԲԴԽ նախագահ Գագիկ Հարությունյանը:
Թեմայի շուրջ «Առաջին լրատվական»-ը զրուցեց Աժ «Իմ քայլը» խմբակցության պատգամավոր Արեն Մկրտչյանի, Հայ կառուցողական կուսակցության նախագահ Անդրիաս Ղուկասյանի և «Քաղաքացու որոշում» կուսակցության անդամ Գոռ Հակոբյանի հետ: Նրանք այսօր Ազգային ժողովում մասնակցել են անցումային արդարադատության վերաբերյալ լսումներին:
«Սա մեկնարկ էր. հանրությունը հասավ այն փուլին, երբ հանրային ուժերը նույնպես դառնում են մասնակից մեր երկրի համար կարևորագույն ծրագրերից մեկի՝ իրավական համակարգի բարեփոխման վերաբերյալ քննարկումներին: Անվիճելի է, որ այդ բարեփոխումները հարկավոր են: Հնչեց նաև կարծիք, որ անցումային արդարադատության անհրաժեշտություն չկա, մարդիկ կան, որ անցումային արդարադատությունը ընկալում են որպես ռեպրեսիվ գործիք, որով «վիրահատական» լուծումներ են տրվում, բայց իրականում այդպես չէ, այսօր էլ օրենսդրական դաշտը թույլ է տալիս պատասխանատվության ենթարկել այն դատավորներին, ովքեր հանցագործություններ են կատարել, բայց դրա զոհը կդառնան հազարավոր մարդիկ: Խոսքն այն մասին է, որ հասկանալով, որ մարդիկ գործել են երկրում տարիներ շարունակ տիրող որոշակի կարգերի պայմաններում, առաջարկվում է փոխադարձ ընդունելի տարբերակ. կամավոր հանձնել մանդատը և դրա դիմաց քրեական հետապնդման չենթարկվել, դա համաներման և հանրային հաշտության ձև է»,- նշեց Ա. Ղուկասյանը:
Ա. Մկրտչյանը հավաստիացրեց, որ աշխատանքային խումբը ձևավորվել է ամիսներ առաջ, բավականին լայնածավալ քննարկումներ են ընթացել, քննարկվել է ոչ թե կիրառել-չկիրառելու հարցը, այլ թե ինչ է անցումային արդարադատությունը և թե ինչպես կիրառել, որովհետև շատ նուրբ են սահմանները: «Անցումային արդարադատությունը գործընթաց է, որը կազմված է երկու բևեռներից՝ իրավական և քաղաքական, ընդունված է անվանել հանրային հաշտության հարթակ: Կան մասնագիտական բուռն վեճեր: Գործնականում կարևոր է, թե ինչ քաշի ծանրաձող ենք բարձրացնում, այսինքն՝ ինչ ենք ներառում անցումային արդարադատության մեջ, օրինակ՝ վեթինգ… »
Գ. Հակոբյանն ընդգծեց, որ անցումային արդարադատությունը միայն դատկան համակարգում վեթինգի կիրառմամբ չի սահմանափակվելու, այլ պետք է ընդգրկի նաև այլ ոլորտներ:
Մանրամասն՝ տեսանյութում:
