Ռոբերտ Քոչարյանի գործով դատական վարույթի կասեցումը և Սահմանադրական դատարան ուղարկելը նոր իրավիճակ է ստեղծել Հայաստանում՝ ոչ միայն իրավական, այլ նաև հասարակական ընկալումների առումով: Թեմայի շուրջ «Առաջին լրատվական»-ի հետ զրույցում դրամատուրգ, արձակագիր, հրապարակախոս Կարինե Խոդիկյանը, անդրադառնալով դիտարկմանը, որ տեսակետներ կան, ըստ որոնց, այն ամենը, ինչ տեղի ուեցավ այս մի քանի օրերի ընթացքում, շատ ավելի խորքային գործընթացների հետևանք է, և այդ գործընթացներն անվանում են սողացող դավադրություն, նշեց. «Եթե նշեմ վտանգի արմատը, ապա երևի ինչ-որ աններելի ժամանակ բաց թողեցինք. հեղափոխությունից հետո կարծես մի պահ շունչ առնելու շռայլությունը մեզ թույլ տվեցինք, բայց պարզվում է, որ նույնիսկ մեկ օր այդ շռայլության իրավունքը չունենք:
Թավիշ անվանենք, թե հակաթավիշ՝ շուշաթուղթ, հիմքում պայքար է: Մի կողմում՝ տասնյակ տարիների ընթացքում ունեզրկված, իրավունքներից զրկված, իրենց երկիրը թողած, օտար երկրներում բախտ որոնողներն են, մյուս կողմում՝ այդ հենքի վրա ֆանտաստիկ հանճարեղությամբ հարստացած և իրեն էլիտա համարող մի խավ է. այս երկուսի միջև կա անջրպետ: Այսքան տարիներ այդ անջրպետի մեջտեղում եղել է կարծրացած լռություն… Եվ հիմա հանկարծ պատնեշը պայթում է, սկսում է խոսքը հորդալ և վեր է բարձրացնում իրողություններ, որոնք երկար տարիներ թաքցվել են, կեղծվել:
Մենք ապրել ենք հաղթանակի բերկրանքը, էյֆորիան և ունեցել ենք աններելի ժամանակի կորուստ: Հիմա խոսում ենք վեթինգի մասին: Բայց ոչ թե այսօր պետք է վեթինգ լիներ, այլ մեկ տարի առաջ»:
Մանրամասն՝ տեսանյութում: