Թուրքիայի Սահմանադրական դատարանը կրոնների ազատության խախտում է համարել երկրի իշխանությունների վարքագիծը Հայկական առաքելական եկեղեցու Պոլսո հայոց պատրիարքի ընտրության հարցում։
«Դատարանը ուսումնասիրել է նախաձեռնող խմբի հայցը պատրիարքի ընտրության վերաբերյալ և բավարարել այն՝ որոշելով, որ Թուրքիայի Սահմանադրության 24-րդ հոդվածը խախտվել է, և կրոնական ազատության խախտում է եղել», – հաղորդում է «Ակոս» թերթը:
Հիշեցնենք, որ 2010 թվականին պատրիարք Մեսրոպ Մութաֆյանի հիվանդությունից հետո Թուրքիայի հայ համայնքի ներկայացուցիչները դիմել են Ներքին գործերի նախարարություն՝ ընտրությունների կազմակերպման թույլտվության համար: Մերժում ստանալուց հետո հայկական կողմը դիմել է նաև Պետխորհուրդ, որտեղ նույնպես մերժվել է:
Հետագայում Թուրքիայի կառավարությունը Պոլսո հայոց պատրիարքի տեղապահ նշանակեց Արամ արքեպիսկոպոս Աթեշյանին: Հայկական կողմը հայց էր ներկայացրել այս որոշման դեմ` նշելով, որ եկեղեցում նման պաշտոն չկա, սակայն հայցը մերժվել էր: