Ինչպես հայտնի է, փաստաբան Ալեքսանդր Սիրունյանը հանցագործության մասին հաղորդում է ներկայացրել Գլխավոր դատախազ Արթուր Դավթյանին, ԱԱԾ տնօրեն Արթուր Վանեցյանին և ՀՔԾ պետ Սասուն Խաչատրյանին։ Սիրունյանի պնդմամբ՝ Ռոբերտ Քոչարյանի և այլոց գործով դատավոր Դավիթ Գրիգորյանի կողմից կայացված դատական ակտն ապօրինի է և կայացվել է դատավորի կողմից իր լիազորությունների ակնհայտ խախտմամբ։
Որպես պատճառաբանություն՝ Սիրունյանը ներկայացրել է այն, որ քրեական գործով վարույթը դատարանի որոշմամբ կարող է կասեցվել, եթե դատարանը գտնում է, որ օրենքը, որը կիրառվում է, հակասում է ՀՀ Սահմանադրությանը, իսկ Գրիգորյանը անցել է իր լիազորությունների սահմանը ու դիմել է ՍԴ-ից մեկնաբանություններ ստանալու խնդրանքով, որի իրավունքը չուներ, բացի այդ, Գրիգորյանի խնդրանքը չի բխում նաև ՍԴ-ի լիազորություններից։ Դատավորը նաև խախտել է միջնորդությունների քննարկման դատավարական ընթացակարգը։
Սիրունյանը հաղորդման մեջ նշել է նաև, որ դատական ակտը ամբողջությամբ կառուցված է Գրիգորյանի անձնական դրդումների վրա, իսկ դատողություններ ու կարծիքներ ունեցող դատավորը պետք է առնվազն ինքնաբացարկ հայտներ։
Երեկ երեկոյան էլ հայտնի դարձավ, որ դատավոր Դավիթ Գրիգորյանն է հանցագործության մասին հաղորդում ներկայացրել փաստաբան Ալեքսանդր Սիրունյանի նկատմամբ՝ պահանջելով քրեական գործ հարուցել կամ կաշառք տալու-ստանալու, կամ իր նկատմամբ սուտ մատնություն կատարելու դեպքի առթիվ։ Նախնական տեղեկություններով՝ Սիրունյանի ֆեյսբուքյան էջում հայտնվել են ենթադրյալ կաշառքի մասին կասկածներ պարունակող գրառումներ՝ «Երկու միլիոն դոլար՝ Նիկոլի գլուխն եք կորցրել», կամ՝ «պագրիշկա գողացողին սկի 1.000.000-ով չեն ազատում», «2 մլն դոլարով սեփական ճիշտն են ծախում» և այլն:
Ըստ տեղեկությունների՝ դատավոր Դավիթ Գրիգորյանը փաստաբան Ալիկ Սիրունյանի ֆեյսբուքյան գրառումներին որոշել է ընթացք տալ՝ նշելով, որ գրառումներն ակնհայտորեն հանցակազմի հատկանիշներ են պարունակում՝ կամ կաշառքի, կամ սուտ մատնության, և խնդրել, որ անկողմնակալ մարմնի կողմից կատարվի քննություն։
Ուշագրավ է, սակայն, որ Սիրունյանի գրառումներում դատավորի անունը ոչ մի տեղ հիշատակված չէ։ Այսինքն՝ Դավիթ Գրիգորյանը պարզապես ենթադրել է, որ դրանք իրեն են վերաբերում։
Ալեքսանդր Սիրունյանը «Առաջին լրատվական»-ի հետ զրույցում ասաց, որ ինքը, իմանալով դատավորի հաղորդման մասին, անձամբ է դիմել գլխավոր դատախազություն և խնդրել անպայման ընթացք տալ դատավորի դիմումին և քրեական գործ հարուցել։
Ինչ վերաբերում է փաստաբանի բողոքին ընդդեմ դատավորի, ապա Սիրունյանն ասաց, որ ինքը որպես իրավաբան ամաչում է, որ կարդում է դատավոր Գրիգորյանի՝ գործը կասեցնելու վերաբերյալ որոշումը: «Դավիթ Գրիգորյանը մայիսի 13-ից սկսում է քննել Քոչարյանի խափանման միջոցի հարցը, որի քննությունը ավարտվում է հինգշաբթի օրը։ Որից հետո Դավիթ Գրիգորյանը գնում է խորհրդակցական սենյակ, ուրբաթ օրը մնում է խորհրդակցական սենյակում և շաբաթ օրը կեսօրին խորհրդակցական սենյակից դուրս է գալիս և հրապարակում մեկ այլ վիճահարույց որոշում, բայց դրա մասին չի խոսքը։ Հաջորդ օրը կիրակի էր, և երկուշաբթի օրը ծնվում է երկուշաբթի օրով թվագրված որոշում, երբ դատարանի շենքերը բլոկած էին, և Դավիթ Գրիգորյանը աշխատանքի չէր գնացել։ Ես պնդում եմ՝ քրեական գործ պետք է հարուցվի, որ փորձագետներն ասեն, թե Գրիգորյանը այդ երբ հասցրեց 78 հատոր գործ կարդալ և կայացնել հաստափոր որոշումը։ Հարց է առաջանում՝ այդ ե՞րբ գրեց այդ որոշումը։ Սա պետք է քննությամբ պարզվի»,- ասաց Սիրունյանը։
Առավել մանրամասն՝ տեսանյութում: