Կաննում, «Մի անգամ Հոլիվուդում» ֆիլմի պրեմիերայի ժամանակ, ռեժիսոր Քվենթին Տարանտինոյին մեղադրել են սեքսիզմի մեջ: Լրագրողներին հետաքրքրել է դերասանուհի Մարգո Ռոբիի ռեպլիկների փոքրաթիվ լինելու պատճառը, ինչպես նաև նրա նոր ֆիլմում կանանց նկատմամբ դաժան վերաբերմունքը, հաղորդում է The Guardian-ը: Ռեժիսորը հրաժարվել է նմանատիպ թեմաների շուրջ բանավիճել և հայտարարել է, որ հերքում է սեքսիզմի վերաբերյալ լրատվամիջոցների ներկայացուցիչների բոլոր մեղադրանքները:
Նա հայտարարել է, որ նման խոսակցությունները կարող են փչացնել հանդիսատեսի ֆիլմի դիտումից ստացած տպավորությունները: Ֆիլմում Ռոման Պոլանսկու կնոջը՝ Շերոն Թեյթին մարմնավորած Մարգո Ռոբին, նման հայտարարություններին ավելի մեղմ է արձագանքել: «Կարծում եմ, որ էկրանային տեսարանները ցույց են տալիս, որ իմ հերոսուհին կարող է իրեն բացահայտել նույնիսկ առանց խոսքերի»,- ասել է դերասանուհին: «Մի անգամ Հոլիվուդում»-ը համարվում է փառատոնի գլխավոր ֆիլմը: Շատ կինոքննադատներ բարձր են գնահատել Տարանտինոյի երկար սպասված նոր աշխատանքը: