«Ես մեկ տարի շարունակ ասել եմ, որ Հայաստանում պետք է տեղի ունենային լուրջ համակարգային փոփոխություններ. ես չէի կարծում, որ հեղափոխություն ասվածը իշխանության մեջ կադրային փոփոխությունն է: Սակայն մայիսյան հաղթանակից հետո հեղափոխություն իրականացրած ուժը բավարարվեց կամ փորձեց բավարարվել ընդամենը գործող համակարգում կադրային փոփոխություններով, և ըստ էության նոր դեմքերով աշխատեց հին համակարգը, իսկ արդարադատության համակարգում ընդհանրապես որևէ փոփոխություն տեղի չունեցավ»,- «Առաջին լրատվական»-ի հետ զրույցում ասաց իրավապաշտպան Վարդան Հարությունյանը:
Մեր զրուցակցի համոզմամբ՝ վարչապետ Նիկոլ Փաշինյանը երեկվա ելույթով ամենաուշը պետք է հանդես գար անցած տարվա օգոստոսին. «Պետք է ջարդվեր հին համակարգը. դա է հեղափոխությունը, իսկ հակառակ դեպքում խոսք կգնար ոչ թե հեղափոխության, այլ իշխանափոխության մասին, ինչի համար չէր, որ ժողովուրդը հրապարակ էր դուրս եկել. ժողովուրդը հրապարակ էր դուրս եկել մերժելու անցածը, իսկ անցածը միայն Սերժ Սարգսյանը չէ, այլ նաև այն համակարգը, որ ներդրել էին Սերժ Սարգսյանը, Ռոբերտ Քոչարյանը»:
Իրավապաշտպանը կարծում է, որ դատավորները պետք է լինեն հանրության ամենահարգված ամենահարգարժան, ամենաճանաչված մարդիկ. «Նրանք և ոչ միայն նրանք, այլև նրանց միջավայրը, նրանց ընտանիքները պետք է լինեն բաց հասարակության համար: Նրանք պետք է ապրեն ամենաթափանցիկ կյանքով, որովհետև այդ անհատները օժտված են այլոց ճակատագիրը որոշելու իրավունքով»:
Մինչդեռ Վարդան Հարությունյանը կարծում է, որ մեր դատավորներից շատ շատերը դատավոր լինելու պատիվը չպետք է ունենային. «Նրանք դատավոր են դարձել իշխանությունների կամայականությունների, սրա կամ նրա թիմի անդամը լինելու, սրա կամ նրա հավատարիմը լինելու հետևանքով, դրա համար էլ նրանց խորթ է դատավորին վայել վարքագիծը, բաց հրապարակային լինելու պահանջը, առանց թելադրանքի դատավճիռ կայացնելու իրավունքը: Նրանք միշտ կաշկանդված են, և այդ կաշկանդված դատավորը չէր կարող դրական արձագանքել վեթինգին, լյուստրացիոն գործընթացներին: Պետք է փոխվեն և՛ արդարադատական մեքենան, և՛ մարդիկ»:
Մեր զրուցակից, սակայն, չի կարծում, որ այդ փոփոխությունները տեղի կունենան Նիկոլ Փաշինյանի մեկ ելույթով. «Պետք է տեղի ունենան սահմանադրական փոփոխություններ. օրենքը պետք է հնարավորություն ընձեռի փոխելու այդ մեքենան»:
Հարցազրույցն ամբողջությամբ՝ տեսանյութում: