Արդեն մի քանի օր է՝ լարված իրավիճակ է ստեղծվել Բագրատաշենի մաքսատանը։ Առևտրականների պնդմամբ՝ արդեն 5-րդ օրն է, ինչ սահմանապահ զորքերի աշխատակիցները ավտոմատներով զինված իրենց թույլ չեն տալիս դուրս գալ մաքսատան տարածքից, իսկ եթե դուրս գան, ապա այլևս ներս մտնել չեն կարողանա։ ԱԱԾ-ն բռնագանձել է նաև առևտրականների ապրանքը։ Անցակետի տարածքում են պահվում նաև իրենց բեռնված ավտոբուսը, ֆորդերը։
Բանն այն է, որ առևտրականները մայիսի 18-ին Թուրքիայից երեք տարբեր տուրիստական ընկերությունների միջոցով ապրանքներ են տեղափոխել Հայաստան, որոնք, սակայն, անհասկանալի պատճառներով մաքսատանը խառնվել են իրար։ 5-րդ օրը մաքսակետի անգարում գիշերող առևտրականները պնդում են, որ չեն կարողանում ապացուցել, թե բեռներից որն ումն է, իսկ մաքսակետում, ըստ առևտրականների պատմածի, հրաժարվում են վերադարձնել բեռը՝ պնդելով, որ այն պետք է բռնագանձեն։
«Տավուշի շրջանի ազգային անվտանգության ծառայության պետը սահմանապահ զորքերին լցրել էր մեր վրա, փորձում էին մեզ վախեցնել։ Ստեղծված իրավիճակում, հասկանալով, որ անհնար է մեզ հետ այդ լեզվով խոսել, եկել առաջարկում է կոմպրոմիսի գալ, որ մենք մեր հասանելիք բեռները ստանանք, իսկ մնացածը մաքսազերծվի, ու կոնֆլիկտը հարթվի։ Բայց այդ բեռը մեր ընկերներինն է, որոնք չէին կարող սպասել, թռել գնացել են, ինչո՞ւ մենք պետք է ուրիշի բեռը մաքսազերծենք»,- «Առաջին լրատվական»-ի հետ զրույցում ասացին առևտրականները՝ պնդելով, որ իրենք մշտապես ներքին կարգով աշխատել են «կանտրաբանդայի» տղաների հետ, նրանց գումար են տվել իրենց ապրանքը մաքսակետով անցկացնելու համար: «Եթե իրենց գումար չտանք, անհնար է այս մաքսակետով ապրանք անցկացնել»,- ասացին առևտրականները՝ հավելելով.
«Հեղափոխությունից հետո գիտեք՝ ինչ է եղել։ Մեկ բան. անվանում է փոխվել։ Սաշիկը փոխվել է Ազգային անվտանգությամբ։ Վանեցյանը պարտավոր է իր անձնակազմը վերանայել։ Քանի որ ԱԱԾ աշխատողները նախ մեզանից գումար են վերցնում, ապա սպառնում մեզ պատժել։ Սաղ գործարքները օրինական անում ենք, մեզ թույլ չեն տալիս մեր ապրանքը մաքսազերծել»,- դժգոհեցին առևտրականները։
Փաստաբան Նորայր Նորիկյանը ևս մեզ հետ զրույցում ասաց, որ այս գիշեր, ժամը 03:00-ի սահմաններում, իրեն է դիմել քաղաքացիներից մեկը՝ հայտնելով Բագրատաշենի մաքսակետում տիրող արտակարգ միջադեպի մասին: Քաղաքացին հայտնել է, որ մաքսակետում 45-ից 50 քաղաքացիների բռնի ուժով արգելափակել են ինչ-որ սահմանափակ տարածքում: Ավելին, քաղաքացիներից մեկը փորձում է ինքնասպանություն գործել: «Առավոտյան ժամը 09.20-ին րոպեին անձամբ դիմել եմ ՊԵԿ նախագահին՝ հայտնելով ահազանգի մասին: Վերջինս նշել է, որ զբաղվում են խնդրով: Կարծում եմ, որ պատկան մարմինները պետք է անհապաղ ներկայացնեն, թե ինչ է կատարվել Բագրատաշենի մաքսակետում, և ինչու չի լուծվում հարցը»,- ասաց Նորիկյանը։
Բագրատաշենի մաքսատանը ստեղծված իրավիճակի կապակցությամբ քննություն է ընթանում։ Այս մասին տեղեկացնում են Ազգային անվտանգության ծառայությունից։ ՊԵԿ-ը ևս արձագանքել է կատարվածին՝ տեղեկացնելով, որ գործողությունները կատարում է ԱԱԾ-ն:
ՓՄՁ համագործակցության ասոցիացիայի փոխնախագահ Սամսոն Գրիգորյանն «Առաջին լրատվական»-ի հետ զրուցյում ասաց, որ կատարվածին ինքը ևս տեղյակ է մամուլից, այդ մարդկանց բարձրացրած աղմուկից: «Ես հասկացա, որ ԱԱԾ-ն հաղորդագրություն է ստացել, որ իրականում ներկայացվել է, որ 4 տոննա ապրանք է ներկրվել, բայց իրականում ներկրվել է 7 տոննա և ավելի։ Դրա համար է ստուգում սկսվել, բայց ընթացքում, ինչպես հասկացա, անհամապատասխանություն, համենայնդեպս, գտնվել է։ Ասենք, մայկան ներկրելուց գուլպայի անվան տակ են գրել։ Բացի այդ, հայտնի է, որ 25 կգ բեռը թույլատրվում է անձնական օգտագործման համար, սակայն այդ բեռում հայտնաբերվել էին նաև վաճառքի ենթակա ապրանքներ»,- ասաց Գրիգորյանը։
Սամսոն Գրիգորյանը նշեց, որ ԱԱԾ աշխատողները մարդկանց չեն պահում, այլ ապրանքը, իսկ մարդիկ որոշել են մնալ ապրանքի հետ։
«Խնդիրը ԱԱԾ-ի հետ է, ԱԱԾ-ն է գործողություններ կատարում։ Գործողությունները կավարտվեն, ԱԱԾ-ն հաղորդագրություն կտարածի, ու կհասկանանք՝ ինչ է կատարվում։ Ամեն դեպքում ծառայողական քննություն է կատարվում։ Հնարավոր է լինեն նաև բացահայտումներ»,- ասաց Գրիգորյանը։
Սամսոն Գրիգորյանի ուշադրությունը ևս գրավել է այն պահը, որ աշխատողները մշտապես ԱԱԾ աշխատողներին գումարներ են տվել։ Գրիգորյանի խոսքով՝ սա արդեն բացահայտ հանցագործության մասին հաղորդում է, որին պետք է ընթացք տրվի, և մեղավորները կանչվեն պատասխանատվության:
