Երեկ հայտնի դարձավ, որ Հայաստանի ազգային հավաքականի ավագ Հենրիխ Մխիթարյանը չի մեկնի Բաքու՝ Եվրոպա լիգայի եզրափակչին: «Մեծ ցավով տեղեկացնում ենք, որ Հենրիխ Մխիթարյանը թիմի հետ չի մեկնի Բաքու՝ Եվրոպա լիգայի եզրափակչին: Մենք մանրակրկիտ ուսումնասիրել ենք Մխիթարյանին թիմի կազմում ընդգրկելու բոլոր տարբերակները, սակայն խնդիրը Մխիթարյանի և նրա ընտանիքի հետ քննարկելուց հետո որոշում ենք ընդունել, որ նա չի մասնակցի խաղին: Մենք ՈՒԵՖԱ-ին մեր խոր անհանգստությունն ենք հայտնել ստեղծված իրավիճակի կապակցությամբ: Մխիթարյանը առանցքային խաղացող է եղել մեզ համար եզրափակչի ճանապարհին, և մենք մեծ կորուստ ենք կրում»,- ասված է լոնդոնյան ակումբի հայտարարության մեջ:
Ավելի ուշ կայացված որոշմանն անդրադարձավ նախ Մխիթարյանը՝ նշելով, որ մեծ ցավ է ապրում, որ չի կարողանա իր թիմին օգնել նման պատասխանատու խաղում: «Հաշվի առնելով բոլոր արդիական տարբերակները՝ մենք եկանք այն եզրակացության, որ պետք չէ թիմի հետ մեկնել Եվրոպա լիգայի եզրափակիչին: Նման խաղեր ֆուտբոլիստների համար ոչ հաճախակի են պատահում, և ինձ համար մեծ ցավ է այն բաց թողնելը: Ես երկրպագելու եմ իմ թիմակիցներին: Եկեք տուն բերենք գավաթը»,- նշել էր մեր ֆուտբոլիստը:
Բնական է, որ տեղի ունեցածը մեծ հիասթափություն է առաջացրել ոչ միայն հայ երկրպագուների շրջանում, այլև ֆուտբոլի աշխարհում: Ըստ էության քաղաքական խնդիրը կարող է լուրջ ազդեցություն ունենալ եվրոպական ակումբային հեղինակավոր մրցաշարի եզրափակչի ելքի վրա: Մխիթարյանն «Արսենալի» առանցքային ֆուտբոլիստներից էր, և նրա բացակայությունը բացասական առումով կփոխի մրցավեճի ընթացքը:
«Սա վատ նորություն է, բայց ոչինչ չենք կարող անել: Սա շատ անձնական որոշում է, և մենք պետք է հարգենք այն: Հիմա քաղաքական խնդիրները չեմ հասկանում, բայց պետք է հարգեմ այդ որոշումը: Այսօր առավոտյան խոսել եմ Մխիթարյանի հետ. դա անձնական որոշում է: Ես հարգում եմ Հենրիխին: Նա ցանկանում է խաղալ՝ օգնելով թիմին, բայց նրանք խոսեցին ընտանիքի հետ ու որոշեցին չգալ: Հասկանում եմ, որ սա շատ անձնական որոշում է իր ընտանիքի համար՝ մտածելով նաև իր երկրի մասին: Չեմ կարող նրան համոզել գալ մեզ հետ, քանի որ ես հարգում եմ նրան: Ինձ համար շատ կարևոր էր, որ նա մեզ հետ լիներ խաղին ու օգներ իր որակներով ու ունակություններով, բայց ոչինչ իմ ձեռքերում չէ: Ամեն դեպքում, ես միանգամայն հարգում եմ Հենրիխի որոշումը»,- ասել է «Արսենալի» գլխավոր մարզիչ Ունայ Էմերին:
Վերջինիս այս հայտարարությունից պարզ է դառնում, որ մեր հավաքականի ավագը Ադրբեջանի մայրաքաղաք չի մեկնելու ավելի շատ սեփական նախաձեռնությամբ: «Արսենալի» և Մխիթարյանի հայտարարությունից անմիջապես հետո հայտարարությամբ էր հանդես եկել նաև ՈՒԵՖԱ-ն՝ նշելով, որ Հայաստանի հավաքականի ավագը Բաքվում որևէ խնդիր չէր ունենա, և բոլոր հարցերը լուծված էին:
«ՈւԵՖԱ-ն, համագործակցելով «Արսենալի» հետ, աշխատանքներ է տարել, ինչի արդյունքում Ադրբեջանի իշխանությունների կողմից երաշխիքներ էինք ստացել այդ երկրի տարածքում ֆուտբոլիստի անվտանգության ապահովման վերաբերյալ: Այդ երաշխիքների շնորհիվ մենք կարող էինք ապահովել ֆուտբոլիստի և ակումբի մյուս ներկայացուցիչների՝ Բաքու անվտանգ ուղևորությունը: Ակումբը տեղյակ էր այն ջանքերից, որ գործադրել էին ՈՒԵՖԱ-ն և Ադրբեջանի իշխանությունները, բայց որոշեց ֆուտբոլիստին չտանել եզրափակիչ խաղին: Մենք պետք է հարգենք ակումբի և ֆուտբոլիստի անձնական որոշումը»,- նշված է ֆուտբոլային կառույցի հայտարարության մեջ:
Կայացված որոշումը, սպասվածի համաձայն, սոցիալական ցանցերում ոչ միանշանակ արձագանք է գտել: Մասնավորապես, մեր հայրենակիցներից շատերն այն կարծիքին են, որ Մխիթարյանն այնուամենայնիվ պետք է մեկներ Բաքու: Ավելին, շատ է խոսվում մեր կիսապաշտպանի՝ Բաքվում գոլ խփելու, ինչպես նաև հայկական եռագույնը ծածանելու մասին: Բնական է, որ բոլորս մեծ հպարտություն և ցնծություն կապրեինք, եթե դա տեղի ունենար, բայց…
Կարծում ենք՝ սա այն դեպքը չէ, երբ Մխիթարյանին պետք է քննադատության ենթարկել Բաքու չմեկնելու համար: Այո, մեզնից յուրաքանչյուրը նույնիսկ անհրաժեշտ անվտանգության միջոցների բացակայության դեպքում հնարավոր է պատրաստակամություն հայտներ Ադրբեջան մեկնելու և ամեն ինչ աներ Հայաստանի պատիվը բարձր պահելու համար: Հայաստանցի շատ մարզիկներ են մեկնել Բաքու, մասնակցել տարբեր տեսակի միջազգային մրցաշարերի: Շատերի մեջ հարց է ծագում՝ ինչո՞ւ այդ մարզիկները առանց երկմտելու մեկնեցին Բաքու, իսկ Մխիթարյանը հրաժարվեց: Որպեսզի պատկերն ավելի պարզ լինի, նշենք, որ ի տարբերություն Բաքու մեկնած հայաստանցի մարզիկների՝ Մխիթարյանը չի ներկայացնում երկիր: Նա ընդամենը լոնդոնյան թիմի մի մասնիկն է: Եթե, օրինակ, Մխիթարյանը լիներ բռնցքամարտիկ կամ ըմբիշ և անվտանգության բոլոր երաշխիքները Ադրբեջանի կողմից ներկայացվելու դեպքում հրաժարվեր մեկնել մրցավայր, պատկերը բոլորովին այլ կլիներ: Եթե Մխիթարյանը դե յուրե լիներ Հայաստանի ներկայացուցիչ, և նժարին դրված լիներ մեր երկրի պատիվը, ապա բոլորս մեզ իրավունք կվերապահեինք պահանջել մեկնել Բաքու և պայքարել մինչև վերջ: Այդ դեպքում Մխիթարյանը ստիպված կլիներ մեկնել Բաքու:
Ընդունենք, որ մեր հավաքականի ավագը մեծ պրոֆեսիոնալ է, խաղում է պրոֆեսիոնալ թիմում: Նա կայացրել է պրոֆեսիոնալ որոշում, որը, կարծում ենք, արժանի է հարգանքի: