Լուրեր
Դատական իշխանությունում հակահեղափոխության փորձ է. Արտակ Զեյնալյանը պետք է պարզաբանի՝ ինչով էր զբաղված 1 տարի

Երկրորդ նախագահ Ռոբերտ Քոչարյանի, նախկին փոխվարչապետ Արմեն Գևորգյանի, Սեյրան Օհանյանի և Յուրի Խաչատուրովի վերաբերյալ գործի վարույթը դատարանի որոշմամբ կասեցվել է և ուղարկվել Սահմանադրական դատարան: Տեղեկությունը հատատել է Սեյրան Օհանյանի պաշտպանը: Նա ասել է, որ դատարանի աշխատակազմից զանգահարել են և տեղեկացրել որոշման մասին, սակայն չեն ասել, թե ինչ հիմքով է կասեցվել: Շատերը սա համարում են սկանդալային որոշում, որի հիմքերն ավելի խորքային են, քան կարող է թվալ առաջին հայացքից: Թեմայի շուրջ «Առաջին լրատվական»-ի հետ քննարկմանը մասնակցեցին իրավապաշտպան Արտակ Կիրակոսյանը և «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը:

Դ. Իոաննիսյանի դիտարկմամբ՝ դատական համակարգի խնդրահարույց որոշումները վաղուց արդեն զարմանք չեն հարուցում: «Դատական իշխանությունը Հայաստանում նույն այն իշխանությունն է, որը տարիներ շարունակ հղիացել է  բազմաթիվ խնդիրներով, և վերջին մեկ տարում համարյա ոչինչ չարվեց դատական համակարգում բարեփոխումների համար: Արտակ Զեյնալյանը պետք է պարզաբանի՝ ինչ էր անում մեկ տարի: Եթե մեկ տարի առաջ սկսվեին անցումային արդարադատության մասին քննարկումները և դատական համակարգի բարեփոխումները, ապա գուցե մի քիչ այլ պատկեր կլիներ, և այսպիսի խայտառակ որոշումներ չէին կայացվի: Առկա է դատական իշխանության ուզուրպացիա»:

Ա. Կիրակոսյանի դիտարկմամբ՝ իներցիայով շարունակվում է նախկին պրակտիկան. «Նախկինում կային արտոնյալներ, որոնց սարսափով են նայում մինչև հիմա: Չեն պատկերացնում, թե նախկին նախագահին կամ բարձրաստիճան պաշտոնյային ինչպես կարելի է դատել: Դատարանի կողմից շոկային ռեակցիա է: Մենք չենք ունեցել իրավունքով առաջնորդվող դատական համակարգ, ունեցել ենք կաշառքով և զանգերով առաջնորդվող դատարաններ»:

«Չեմ կարծում, թե դատարանն ինքն իրեն է որոշել Քոչարյանի խափանման միջոցը փոխել»- նշեց Դ. Իոաննիսյանը՝ ընդգծելով, որ եթե ինչ-որ բան չփոխվի, այս գործընթացը, ամենայն հավանականությամբ, կավարտվի քրեական պատասխանատվությունից Քոչարյանի ամբողջական ազատմամբ:

«Դատական իշխանությունում հակահեղափոխության փորձ ենք տեսնում, և սա է պատճառը, որ Ն. Փաշինյանը նորից կոչ արեց մարդկանց դուրս գալ և փակել դատարանների մուտքերը, որպեսզի դատարաններին ցույց տա, որ չի կարելի չառաջնորդվել օրենքներով և Սահմանադրությամբ: Դատարանները, թքած ունենալով օրենքերի և սահմանադրության վրա, կայացնում են որոշումներ նախկին իշխանության ներկայացուցիչներին քրեական պատասխանատվությունից փրկելու համար»:

Մանրամասն՝ տեսանյութում:

  • Դիտումներ՝ *